Хави Эрнандес “Барселона” бош мураббийи лавозимини эгаллаганидан сўнг дарҳол Каталония клуби анъаналарини давом эттирди. Испаниялик мутахассис ўзининг дебют учрашувида “Эспаньол”га қарши Каталония дербисида ғалаба қозонди.
Шу тариқа, янги мураббийлар штаби қарийб беш йилдан бери давом этаётган серияни давом эттиришга муваффақ бўлди – “кўк анорранглилар” “Камп Ноу”даги асосий рақиби устидан кетма-кет 14 учрашувда ғалаба қозонишди. Қолаверса, ушбу учрашувларнинг 11 тасида “Барселона” ўз дарвозаси даҳлсизлигини сақлаган.
Қўлга киритган уч очко Хави шогирдларига турнир жадвалидаги ўрнини бироз яхшилашга ва Испания чемпионати пешқадамига яқинлашиб, олтинчи поғонага кўтарилишларига ёрдам берди.
