“Metallurg” Navoiyning  “Qizilqum” jamoasi bilan shu kungacha O‘zbekiston chempionatlarida 43 bor kuch sinashgan. Mazkur o‘yinlarning 14 tasi “Metallurg” g‘alaba qozongan. 11 ta uchrashuvda kuchlar teng kelgan. 18 ta o‘yinda esa “Qizilqum” jamoasining qo‘li baland kelgan. Kiritilgan va o‘tkazib yuborilgan to‘plar farqi 59:54, vohaliklar foydasiga.

“Metallurg”ning bu raqibi ustidan qozongan eng yirik hisobdagi g‘alabasi 4:1 (2006, 2019) ni tashkil etadi. “Qizilqum” esa bitta uchrashuvda bekobodliklar darvozasiga javobsiz beshta to‘p (0:5, 2006) yo‘llagan.

Ushbu jamoalarning shu yil Bekobodda bo‘lib o‘tgan bahsida Hamid Axtyamov shogirdlari 2:1 hisobida g‘alaba qozonishgandi. Bevosita Navoiyda o‘tkazilgan kechgan o‘yinlarga to‘xtaladigan bo‘lsak, unda mezbonlar katta ustunlikka ega: 12 ta g‘alaba, 6 ta durang, 3 ta mag‘lubiyat, to‘plar nisbati – 32:15.

Quyida mazkur jamoalarning Navoiy shahrida bo‘lib o‘tgan so‘nggi beshta uchrashuvida qayd etilgan natijalar bilan tanishing:

24.11.2020. “Qizilqum” – “Metallurg” – 1:0
29.10.2019. “Qizilqum” – “Metallurg” – 1:1
05.05.2018. “Qizilqum” – “Metallurg” – 1:2
19.11.2017. “Qizilqum” – “Metallurg” – 2:1
28.05.2016. “Qizilqum” – “Metallurg” – 1:1

“Qizilqum” haqida

Navoiyning "Qizilqum" jamoasiga 1967 yilda asos solingan. Dastavval jamoa Zarafshon shahrida “Progress” nomi bilan tashkil etilgandi. Mamlakat mustaqilligiga qadar jamoa viloyat, respublika birinchiligi hamda sobiq Ittifoq chempionati ikkinchi ligasida o‘ynagan. 1992 yilda O‘zbekiston birinchiligida qatnashib kelgan jamoa 1999 yili quyi ligada 3-o‘rinni egalladi va oliy ligaga yo‘llanmani qo‘lga kiritdi. 1994 yildan “Qizilqum” nomi bilan yuritib kelinayotgan jamoa oliy ligadagi uchinchi mavsumida eng yuqori natijasini qayd etdi, ya’ni bronza medaliga sazovor bo‘ldi.

Bugungacha navoiyliklar kuchlilar safida 633 ta uchrashuv o‘tkazib, shulardan 222 tasida g‘alaba qozongan, 141 o‘yinda durangga erishgan, 270 o‘yinda esa imkoniyatni boy bergan. Kiritilgan va o‘tkazib yuborilgan to‘plar farqi – 767:908.

“Qizilqum” jamoasining oliy ligadagi eng yirik g‘alabasi – 7:0 (2003 yil, “Guliston”), eng yirik mag‘lubiyati – 0:11 (2007 yil, “Paxtakor”) tashkil etadi.