Superliganing 26-turidan o‘rin olgan "Qizilqum" - "Metallurg" (2:3) uchrashuvidan keyin mehmonlar bosh murabbiyi Luisma Ernandes matbuot anjumanida ishtirok etdi.

— Jamoamizni ko‘proq ruhiy tarafdan tayyorlash lozim edi. Oxirgi turda hammasi o‘zimizga bog‘liq ekanligini tushuntirdik. Jarohatlanganlar ko‘pligiga qaramasdan, mavjud futbolchilar borlarini berib harakat qilishdi. Ruhiy tayyorgarligimiz yaxshiligi hisobiga g‘alaba qozondik.

— Uchrashuvga tayyorgarlik jarayonida ko‘proq nimalarga ahamiyat berilgan?
— Bu jamoani juda qiyin holatda qabul qilib oldim, lekin shunga qaramasdan, yigitlar bilan astoydil mehnat qildik. Asosiy e’tiborni o‘z jamoamiz o‘yiniga qaratdik va jipslashgan holda harakat qildik.

— O‘yinni kuzatish davomida butun-diqqat e’tiboringiz shu o‘yinga qaratilganmidi yoki "Surxon" – "Mash’al" bahsi haqida o‘yladingizmi?
— To‘g‘risini aytsam, u o‘yinga umuman e’tibor bermadim. Diqqat-e’tiborimizni faqat o‘zimizning o‘yinimizga qaratdik, buni yigitlarga ham aytgandim.

— O‘zbekiston kubogi yarim final uchrashuvlarini kuzatib bordingizmi?
— Ha.

— Kubok finali favoriti qaysi jamoa deb o‘ylaysiz?
— Qiziq o‘yin bo‘ladi. Mavsumning yakuniy o‘yin bo‘lgani uchun ikki jamoa ham borini berib harakatlanadi. Qog‘ozda "Paxtakor" – favorit, lekin "Nasaf" jang taklif qiladi.

— Ispaniya va O‘zbekiston futbolida o‘xshash jihatlar bormi?
— Hozircha haqiqiy ispan futboli qanaqa bo‘lishini muxlislarga ko‘rsatganimiz yo‘q. Umid qilamanki, keyinchalik ispan futboli qanday bo‘lishini "Metallurg" bilan namoyish etamiz. Albatta, o‘xshash jihatlar bor. Biroq hozir bizga natija muhimligi uchun shunga mos uslubdan foydalandik. Futbol o‘ziga ishongan, mard va jasur insonlar o‘yini.

Fursatdan foydalanib, "Metallurg" rahbariyatiga, muxlislariga va jamoa xodimlariga o‘z minnatdorchiligimni bildiraman.

— "Metallurg"ni Ispaniyaning qaysi jamoasiga qiyoslash mumkin?
— Hozircha "Atletiko Madrid" (kuladi). Chunki asosiy urg‘u natijaga qaratdik va shunga mos uslubda o‘ynadik. Biroq keyingi mavsumdan boshqa jamoalarga o‘xshasak kerak...