Ma’lumki, har yil oxirida (2020 yildan tashqari) Fransiyaning nufuzli “France Football” jurnali dunyoning eng yaxshi futbolchilarini aniqlab keladi.
Shular qatorida ba’zi futbolchilar borki, ular bir kalendar yili davomida ajoyib harakat qiladi va nashr tomonidan taqdim etiladigan sovrinlar uchun asosiy nomzodlar kuchli 30 taligidan joy olishga muvaffaq bo‘ladi. “Stadion.uz” sizga 2007 yildan beri kutilmagan, g‘alati va shov-shuv ko‘targan nominasiyalar haqida so‘zlab beradi.
Yunus Mahmud (“Al-Garafa”) - 2007 yil
Mahmud Yevropa futboli havosidan ham nafas olmagan. U butun faoliyatini Yaqin Sharq mamlakatlari chempionatlarida o‘tkazdi. Yevropadan tashqarida o‘ynagan qancha o‘yinchi OT uchun da’vogarlar ro‘yxatiga kirgan? U iroqliklar orasida mukofotga nomzod bo‘lgan yagona shaxs.
Yunus qanday qilib dunyoning eng yaxshi futbolchilari reytingida bo‘lishga loyiq edi? Hammasi oddiy: o‘sha yili Iroq Osiyo kubogini qo‘lga kiritdi va forvard o‘sha turnirda o‘z terma jamoasining bosh qahramoni bo‘ldi. Mahmud “Oltin butsa” va Osiyo Kubogining MVP sovrinini qo‘lga kiritdi.
Eng yaxshi futbolchi uchun ovoz berishda u bor-yo‘g‘i 29-o‘rinni egalladi. Lekin, Mahmud van Persi, Tevez, Giggz va Raul va David Vilya kabi ftbolchilardan yuqoriroq o‘rinlarni egallagandi.
Nani ("Manchester Yunayted") - 2011 yil
2010 yilda “Oltin to‘p”ni berish huquqi FIFAga o‘tgan va o‘shanda nomzodlarni futbol funksionerlari tanlagan edi. Boshqalar qatorida, ular OTga yarim himoyachi “Manchester Yunayted” futbolchisi Nani nomzodini ko‘rsatishga qaror qilishdi. Bir paytlar Yevropaning eng iqtidorli futbolchilaridan biri sanalgan portugaliyalik bunday sharafga loyiq emasligini hech kim gapirmadi.
Biroq, mukofotga nomzodlar ro‘yxatida uning nomi tasodif emas, balki tasodifdir, chunki u ilgari ham, keyin ham nomzodlar soniga boshqa kirmagan.
Mario Balotelli (“Manchester Siti”) - 2012 yil
Ko‘rinishidan, Balotelli nomzodlar ro‘yxatiga faqat Yevro-2012 yarim finalida Germaniya terma jamoasiga qarshi o‘yinda (2:1) o‘ynaganligi uchun kiritilgan edi. O‘shanda Mario ikkita gol urdi, keyin esa futbolkasini yechib, dabdabali pressini ko‘rsatdi. Bu hiyla memlar to‘plamiga aylandi va umuman olganda, italiyalik nominasiyalar ro‘yxatida yuqori o‘rinlarni oldi.
Rostini aytaylik: Balotelli o‘sha mavsumda o‘z imkoniyatlaridan pastroq o‘ynadi. U “Manchester Siti” tarkibidagi o‘yinlarda hech qanday mo‘’jiza ko‘rsatmadi, Italiya terma jamoasida esa uning o‘yini ko‘ngildagidek emasdi. Yevroda uchta gol, albatta, yaxshi, lekin Mario “Oltin to‘p” uchun da’vogarlar qatoriga kirishga loyiqmi edimi, yoki yo‘qmi hamon ochiq savolligicha qolmoqda.
Dimitri Payet (“Vest Xem”) – 2016 yil
Payet mohir dribling ustasi va yaxshi futbolchi, ammo u «Evropa futboli yulduzi» bo‘lishdan yiroqligi aniq. 2016 yilda Dimitriy “Oltin to‘p”ga nomzod bo‘lgan edi. U sovringa haqiqiy da’vogar bo‘lmagani aniq. Ammo bu reytingda 29 yoshli vingerning paydo bo‘lishi ham allaqachon hayratlanarli bo‘lgan.
Payet nomzodlar ro‘yxatidan qanday o‘rin oldi? Katta ehtimol bilan, Fransiya terma jamoasi tarkibidagi yorqin o‘yin sabab bo‘lgan. Yevro-2016da Dimitriy “uch ranglilar” safida uchta gol urdi va butun turnirning eng yaxshi o‘yinchilaridan biriga aylandi. Natija – OTda nomzodlari orasida 23-o‘rin.
Sadio Mane (“Liverpul”) – 2017 yil
Manening “Oltin to‘p”ga nomzod bo‘lishi noto‘g‘ri ham, g‘alati ham emas. Sadio – so‘nggi besh yil ichida “Liverpul”da yaxshi saviyadagi o‘yin ko‘rsatib kelayotgan kuchli futbolchi. Ammo uning “Oltin to‘p-2017” da’vogarlar ro‘yxatiga kirishi umuman kutilmagan edi. Senegallik o‘sha yili birorta ham kubokni qo‘lga kirita olmagan va individual miqyosda u faqat Angliya Premyer-ligasining yilning eng yaxshi jamoasidagi ro‘yxatidan o‘rin olishi bilan kifoyalangan.
Mane eng yaxshilar ro‘yxatida 23-o‘rinni egalladi. Shu bilan birga, forvard ovoz berishda o‘sha yili A seriyaning eng yaxshi to‘purari bo‘lgan Edin Jeko va “Real”ning asosiy hujumchisi Karim Benzemani ortda qoldirishga erishgan.
Donni van De Bek (“Ayaks”) – 2019 yil
Van De Bek ushbu ro‘yxatdagi OT nominasiyasi uchun birorta ham ovoz olmagan yagona futbolchidir. Rostini aytsak, u qanday qilib mukofotga da’vogarlar qatoriga kirgani ham aniq emas. 2019 “Ayaks” haqiqatan ham kuchli o‘yin namoymish etgan. Esingizda bo‘lsa, o‘sha mavsumda Erik ten Xag jamoasi Chempionlar Ligasi yarim finaliga yo‘l olgandi.
Ammo Donni bu jamoaning eng asosiy o‘yinchisi bo‘lmagan. U yerda birinchi navbatda Hakim Ziyesh, Matteys de Ligt, Frenki de Yong va Dushan Tadich kabi futbolchilar edi. Lekin negadir faqat van De Bek va Tadich nominasiyaga kirishgandi.
Eslatib o‘tamiz, «Oltin to‘p-2021» taqdirlash marosimi 29 noyabr kuni Parijda bo‘lib o‘tadi. Ushbu tadbirning onlayn translyasiyasi bizning veb-saytimizda mavjud bo‘ladi.
Jamshidjon Mahmudov tarjimasi.
