Xabaringiz bor, joriy yilning 27 noyabr kuni yubiley, 30-milliy chempionatimiz o‘z yakuniga yetdi. Mavsumlar oralig‘idagi tanaffus paytida esa har bir jamoa tarkibida o‘zgarishlar bo‘lishi tabiiy. Albatta, “Navbahor” ham bundan mustasno emas.

“Lochinlar” safini 3 nafar futbolchi, ya’ni, yarim himoyachilar – rossiyalik 28 yoshli Ivan Solovyov, 27 yoshli Quvondiq Ro‘ziyev va bolgariyalik 30 yoshli Boyan Naydenov tark etishdi.

Ta’kidlash joizki, mazkur futbolchilar “Navbahor” safini klub bilan o‘zaro ikki tomonlama kelishuv asosida tark etishdi.

O‘zining jonkuyarligi hamda ajoyib o‘yinlari bilan maydonda alohida ajralib turgan Ivan Solovyov jamoa tarkibiga 2019 yilgi mavsumda qo‘shilib, 3 yil (2019-2021 yillar) davomida “lochinlar” sharafini himoya qilib, jami 70 ta o‘yinda maydonga tushib, 5626 daqiqa harakatlangan holda, 6 ta golga mualliflik, 8 ta golga assistentlik qildi.

“Lochinlar” tarkibiga joriy mavsumda qo‘shilgan Quvondiq Ro‘ziyev esa jami 22 bahsda maydonga tushib, 1671 daqiqa harakatlandi.

Jamoa safiga shu yilgi yozgi transferda jalb etilgan bolgariyalik tajribali yarim himoyachi Boyan Naydenov esa 14 ta o‘yinda maydonga tushib, 1136 daqiqa harakatlangan holda, 2 ta gol mualliflik qildi va 1 ta golga “pas” berdi.

“Navbahor” PFK mazkur futbolchilarga jamoamiz tarkibidagi yorqin o‘yinlari, gollari, assistlari va “lochinlar”ning g‘alabalariga munosib hissalarini qo‘shganliklari bois, o‘z minnatdorchiligini bildiradi hamda keyingi faoliyatlarida omad yor bo‘lishini tilab qoladi.

“Navbahor” PFK matbuot xizmati.