"Atletiko Madrid"dan ijaraga olingan "Yuventus" hujumchisi Alvaro Morata mavsum so‘ngida jamoani tark etishi mumkin, deb xabar beradi football-italia.
Turin klubi 29 yoshli ispaniyalik futbolchi uchun 35 million yevro to‘lashga tayyor emas. Aynan shu miqdor ijara muddati tugagandan so‘ng o‘yinchini sotib olish to‘g‘risidagi bandda ko‘rsatilgan. Morataning ikki yillik ijarasi uchun 20 million yevro sarflagan "Yuventus" agar "Atletiko" to‘lov miqdorini kamaytirsagina futbolchini sotib olishi mumkin. Qayd etilishicha, Italiya klubi bor etiborini boshqa futbolchilarni sotib olishga qaratish e’htimoli mavjud.
Joriy mavsumda Morata Italiya chempionatining 15 ta uchrashuvida 3 ta gol urdi va bitta golli uzatmani amalga oshirdi. Shuningdek, u Chempionlar ligasining to‘rtta o‘yinida ikkita gol va bir golli uzatmani amalga oshirishga ulgurgan.
