O‘zbekiston Professional futbol ligasi odatga ko‘ra, har oy Superliganing eng yaxshi murabbiyi va futbolchisi, shuningdek, eng chiroyli golini aniqlab kelmoqda. Ortda qolgan noyabr oyida Superligada 3 ta tur bahslari bo‘lib o‘tdi. Mazkur bellashuvlar davomida ko‘plab futbolchi va murabbiylar o‘zlarini ko‘rsatishga erishdi.
Noyabr oyining eng yaxshi murabbiyi bo‘lish uchun nomzodlar
Piter Xyuistra (“Paxtakor”) – 3 o‘yin, 2 g‘alaba, 1 mag‘lubiyat, to‘plar farqi 10-3
Luisma Ernandes (“Metallurg”) – 3 o‘yin, 2 g‘alaba, 1 mag‘lubiyat to‘plar farqi 4-2
Viktor Jalilov (“Navbahor”) – 3 o‘yin, 2 g‘alaba, 1 mag‘lubiyat, to‘plar farqi 5-4
Shuhrat Maqsudov (“Bunyodkor”) – 3 o‘yin, 3 g‘alaba, to‘plar farqi 7-3.
Noyabr oyining eng yaxshi futbolchisi bo‘lish uchun nomzodlar
Temurxo‘ja Abduholiqov (“Lokomotiv”) — 3 o‘yin, 3 gol (2 tasi penaltidan), 7 marotaba darvoza tomon aniq zarbalar
Sherzod Temirov (“Paxtakor”) — 2 o‘yin, 3 gol, 4 marotaba darvoza tomon aniq zarbalar
Husain Norchayev (“Nasaf”) — 4 o‘yin, 3 gol, 4 marotaba darvoza tomon aniq zarbalar
Hurshid G‘iyosov (“Bunyodkor”) — 3 o‘yin, 3 gol, 1 assist, 89 ta aniq pas, 10 yakkakurashlar
Martin Boake (AGMK) — 3 o‘yin, 3 gol, 9 marotaba darvoza tomon aniq zarbalar.
Eslatib o‘tamiz, ovoz berish jarayonida Superliga klublari bosh murabbiylari va sardorlari hamda muxlislar ishtirok etishadi. Superliganing 14 klubi bosh murabbiylari hamda sardorlari ko‘rsatilgan nomzodlarni uchtalikka joylashtirib chiqadi. Dastlabki o‘rinda ko‘rsatilgan nomzod 3, mos ravishda keyingi ikki o‘rindagilar 2 va 1 ochkolik bo‘ladi.
O‘zPFL tomonidan futbol muxlislari o‘rtasida o‘tkazilgan so‘rovnoma natijasi esa murabbiy va sardorlar o‘rtasida o‘tkazilgan so‘rovnoma natijalariga qo‘shiladi. Bunda muxlislar ovozi katta ahamiyatga ega bo‘lib, birinchi o‘rinni egallagan nomzod 6, mos ravishda keyingilar 4 va 2 ochkodan qo‘lga kiritadi.
Yakunda eng ko‘p ball to‘plaganlar oyning eng yaxshilari sifatida e’tirof etiladi. Mazkur havola orqali noyabr oyining eng yaxshilarini aniqlash jarayonida ishtirok etish imkoniyatiga egasiz.
