"Barselona" hujumchisi Serxio Agueronig kardiologi Roberto Peydro argentinalik futbolchining yuragida qanday muammolar kuzatilganiga izoh berdi. Eslatib o‘tamiz, 33 yoshli o‘yinchi kecha faoliyatini yakunlaganini e’lon qildi.

"2004 yilda biz undagi yurak urishi ritmining o‘zgarishini davolagandik. Shunga qaramay, u 17 yil futbol o‘ynadi. Bu safar esa o‘sha kasallikka aloqasi bo‘lmagan boshqa muammo yuzaga chiqdi. Shuningdek, bu koronavirus yoki vaksinasiyaga bog‘liq emas.

Agueroda yuzaga kelgan bu galgi aritmiyaning sababi aniq emas. Uning yuragida kichik chandiq paydo bo‘lgan, bu esa aritmiyaga olib kelgan. Uchrashuv paytida esa taxikardiya ro‘y berdi. Nazarimda, uning hayotida qachondir kichik miokardit yuz bergan. O‘shandan bir millimetrli chandig‘ qolgan. Gap kovidda emas.

Agar u 23 yoshda bo‘lganida, uch oy kutib, so‘ngra tibbiy tekshiruvdan o‘tkazishimiz mumkin edi. Ammo hozir bunday qilishdan ma’no yo‘q. Eng yaxshi qaror — futbolchilikni tamomlash. U maslahatimizga amal qildi.

U do‘stlari bilan futbol o‘ynasa, muammo yuz bermaydi. U yuqori yuklama ostida testdan o‘tdi va yurak urishida muammo ro‘y bermadi", – dedi shifokor.