«Manchester Siti» klubi afsonasi kutilmaganda o‘z faoliyatini yakunlashga majbur bo‘ldi. Afsuski, Aguero o‘zi sevgan klub «Man Siti»da emas, balki «Barselona»da futbol bilan xayrlashdi(33). Ushbu voqea o‘tgan oyda, o‘yinlarning birida futbolchining maydonga yiqilib tushishi bilan boshlandi. Ko‘p o‘tmay, Serxioning yurak bilan bog‘liq muammoga duch kelganligi oydinlashdi. Futboldan ketishga majburlik – bu ushbu o‘yinning eng sovuq haqiqatlaridan biri hisoblanadi. Bunda futbolchilar kutilmagan jarohatlar sabab yoxud futbolga bo‘lgan mehri yo‘qolib qolgani tufayli faoliyatiga yakun yasashi mumkin. Afsuski, shunday voqealarga tarix ko‘p marta guvohlik bergan. Quyida esa aynan Kun Aguero singari sevimli kasbidan erta mosuvo bo‘lganlar haqida gap boradi.
Erik Kantona
«Manchester Yunayted»ning barcha davrlardagi eng yaxshi futbolchilaridan biri va o‘ziga xos xarakter sohibi bo‘lgan Kantona, 1997 yilda butun dunyoni hayratga solib, boshqa futbol o‘ynamasligini bildirgan edi. O‘shanda u endigina 30 yoshni qarshi olgan. «Qizil iblislar» jamoasi ramziga aylanib qolgan hujumchi juda erta futboldan ketdi va bir nechta yirik turnirlarda qatnashish baxtidan mosuvo bo‘ldi. Jumladan, u ketganidan ko‘p o‘tmay, «MYU» trebl bilan katta sahnaga chiqadi(1999 yil, YECHL). Qolaversa, Fransiya terma jamoasi 1998 yilda Jahon chempionatini qabul qilib, o‘zlari turnir g‘olibiga aylanadi. Ammo bu paytda Kantona jamoa ichida yo‘q edi.
Brian Laudrup
Ushbu nomni uning akasi, Mikael(Laudrup) bilan chalkashtirmasligingizni so‘ragan bo‘lardik. Brian ham futbol tarixida alohida nom sifatida e’tirof etiladi. Haqiqatdan ham futbolchi o‘zgacha uslub sohibi edi. U «Milan» bilan birga YECHL g‘olibligini qo‘lga kiritadi. Shuningdek, Laudrup to‘rt marta o‘z yurti Daniyada yilning eng yaxshi futbolchisi deb topiladi. Ming afsuslar bo‘lsinki, tuganmas jarohatlar futbolchini erta sindirib qo‘ydi. U atigi 31 yoshida, 2000 yilda futboldan ketdi.
Marko van Basten
Golga eng xaris futbolchilardan biri. U raqib darvozasi oldida go‘yo yirtqich maxluqqa aylanar edi. Van Basten o‘z faoliyati davomida uch marta FIFAning «Oltin to‘p»ini qo‘lga kiritgan. Afsuski, Niderlandiya terma jamoasi afsonasi 31 yoshida futbolni tark etdi. Uning o‘ziga xos qobiliyatiga hatto Diyego Maradona ham tan bergan edi. Undan sevimli futbolchisi haqida so‘ralganda, Maradona shunday deydi: «Mening eng yoqtirgan futbolchim Romario hamda Marko van Bastenning o‘rtasida». Chindan ham Marko kabi talantlar kamdan-kam topiladi.
Xidetoshi Nakata
Nakata 1997 yilda Italiya A seriyasida harakat qilgan ikkinchi yapon futbolchisiga aylangan edi. Keyinchalik, italyan futboli dunyodagi eng yaxshisi deya e’tirof etiladi. Yapon futbolchisi tug‘ma texnikaga ega edi. U butun dunyoga yapon futbolini tanitadi. Osiyoning eng yaxshi futbolchisi sifatida Nakata 1997 yilda Italiyaning «Peruja» klubiga borib qo‘shiladi. U ham jarohatlar sabab 29 yoshida futboldan ketdi. Keyinchalik esa model bo‘ldi hamda moda olamida faoliyat yuritdi.
Jyust Fonten
Yana bir sobiq fransuz futbolchisi milliy terma jamoadagi harakatlari bilan tanilgan edi. U termada gol urish bo‘yicha eng yaxshi markaziy hujumchi sifatida qaraladi. Fonten hali ham FIFA Jahon chempionatining bitta musobaqasida eng ko‘p gol urish bo‘yicha yetakchi sanaladi. U 1958 yigi mundialda Fransiya terma jamoasi tarkibida 13ta golga mualliflik qilgan edi. Ammo u bilan ham qayg‘uli voqea yuz berdi. Jiddiy jarohat olgan Fonten, 28 yoshida futboldan ketdi.
Shunday qilib, Serxio Aguero kabi ular ham juda juda erta o‘z muxlislarini tashlab ketishdi. Ammo ajoyib harakatlari bilan jahon futbolining haqiqiy darg‘alari sifatida o‘zidan o‘chmas iz qoldirdi.
ingliz tilidan Jaloliddin ISMATOV tarjimasi
