Transfermarkt portali Italiya «A» seriyasida to‘p surayotgan futbolchilar transfer bahosini ham yangilab chiqdi. Italiya chempionati vakillari orasida narxi keskin ko‘tarilganlar futbolchilar ro‘yxatida «Fiorentina» yetakchisi Dushan Vlaxovich yetakchi.

Serbiyalik hujumchining transfer qiymatiga 20 million yevro qo‘shildi (hozirgi summa - 70 million yevro). «A» seriyaning transfer bahosi bo‘yicha eng ko‘p yo‘qotgan futbolchilariga kelsak, «Napoli» hujumchisi Lorenso Insenye -13 million yevro (hozirgi summa - 35 million yevro) bilan 1-o‘rinda.

Avvalgi reytingda eng qimmatlashgan futbolchilar qatoriga kirgan hamyurtimiz Eldor Shomurodov (transfer summasi 7 milliondan 14 million yevroga ko‘tarilgandi) bu safar narxi arzonlashganlar ro‘yxatida qayd etildi. U baho bo‘yicha 2 «limon» yo‘qotdi. Ayni payt «Roma»dagi legionerimizning transfer summasi 12 million yevroga teng.

Umuman olganda, transfermarkt portali MDH hududidan chiqqan futbolchilarning transferidagi o‘zgarishlarga alohida e’tibor qaratdi. Chunonchi, Eldordan tashqari, armanistonlik Genrix Mxitaryan («Roma»), rossiyalik Aleksey Miranchuk («Atalanta»), ukrainalik Viktor Kovalenko («Spesiya») va rossiyalik Aleksandr Kokorin («Fiorentina») ham transfer narxi bo‘yicha pasayishdi. Faqat «Atalanta»ning 14ta o‘yinida 4ta gol urgan ukrainalik Ruslan Malinovskiyning bahosi o‘zgarmadi - 30 million yevro.