Angliyaning «Manchester Yunayted» klubi bosh murabbiyi Ralf Rangnik APLning 23-tur doirasida «Vest Xem» (1:0) ustidan qo‘lga kiritilgan g‘alaba haqidagi fikri bilan o‘rtoqlashdi.

«G‘alabaning eng yaxshi turi bu – so‘nggi soniyalarda gol kiritganingizda va o‘z darvozangiz dahlsizligini saqlab qolganingizda. O‘ylaymanki, haqli g‘alabani qo‘lga kiritdik.

«Vest Xem»ga qarshi o‘yinda sabr qilish kerak. O‘yin oxirlarida darvozaga zarba bergandan ko‘ra, qo‘shimcha to‘p uzatishlarni amalga oshirgan yaxshiroq deb bir necha marotaba o‘yladim.

Bir necha kun avval «Brentford»ga qarshi o‘ynaganimizni hisobga oladigan bo‘lsak, jamoa jismoniy jihatdan yaxshi edi. O‘yin davomida sabrli bo‘lishimiz kerakligini juda yaxshi bilib turgandik va himoyada ko‘rsatgan o‘yinimizdan va raqibdan to‘pni olib qo‘yishdan ko‘nglim to‘ldi.

Zaxiradan maydonga tushgan uch nafar futbolchi vaziyat sodir etganidan va gol kiritganidan xursand bo‘ldim. Ko‘pchilik ishtirok etgan vaziyatni golga aylantirish o‘ziga xos bo‘ladi», – dedi Rangnik Sky Sports bilan suhbatda.