Kataloniyaning «Barselona» klubi futbolchisi Anssumane Fati Ispaniya Kubogining 1/8 final doirasida «Atletik» (2:3) jamoasiga qarshi o‘yinda olgan jarohatini operasiya qilish haqida hamon o‘ylamoqda.

Futbolchi bilan uchrashuvda klub tibbiy xodimlari Fatiga operasiya qilishni tavsiya qilishgan. Lekin, Fati o‘ylab olish uchun biroz vaqt so‘radi. Fati oldingi mavsumda meniskus jarohati tufayli, bu safargi operasiyaga ham ikkilanib turibdi. O‘shanda futbolchiga to‘rt oydan keyin maydonga qaytishini aytishgandi, lekin Ansuning tiklanish jarayoni uchun salkam bir yil vaqt ketgandi.

Avvalroq, futbolchi operasiyaga qarshi bo‘layotgani, klub esa tezroq Fati jarrohlik amaliyotini o‘tashi tarafdori ekanligi haqida xabar tarqalgandi. Agar operasiya qilinadigan bo‘lsa, Fati kamida 3-4 oy maydonga tusha olmaydi. Lekin, agar Fati konservativ davolanadigan bo‘lsa, u holda ikki oydan keyin maydonga qaytishi mumkin, biroq, bu jarayonda futbolchining jarohati qaytalanib qolish ehtimoli yuqori.

Futbolchi yaqin soatlar ichida so‘nggi qarorini aytadigan bo‘ldi.