Myunxenning «Bavariya» klubi hujumchisi Serj Gnabri jamoa rahbariyati bilan yangi shartnoma borasida hanuzgacha kelisha olmayapti.

26 yoshli futbolchi nemis klubi safida qolmoqchi, biroq u o‘ziga taklif qilingan moliyaviy shartlardan rozi emas. Ta’kidlanishicha, hujumchi o‘z jamoadoshlari Leroy Sane hamda Kingsli Komanniki singari yuqori maosh olishni xohlamoqda. Bu bonuslarni hisobga olmaganda, yiliga taxminan 15 million yevroni tashkil etadi.

O‘z o‘rnida «Bavariya» ham Gnabrini qo‘yib yuborishni istamayapti. Bosh murabbiy Yulian Nagelsmann ham futbolchini jamoada saqlab qolishdan manfaatdor.

Ushbu vaziyatni Yevropaning bir qator top-klublari diqqat bilan kuzatib turishibdi. Agar Gnabri klubdan ketadigan bo‘lsa, «Real Madrid», «Barselona», «Liverpul» hamda «Manchester Yunayted» jamoalari uni o‘z safiga qo‘shib olishga tayyor. Gnabrining amaldagi shartnomasi 2023 yilning yoziga qadar amal qiladi.

Ma’lumot uchun, nemis futbolchisi ushbu mavsumda jamoasining jami 27 ta o‘yinida maydonga tushib, 12 ta gol va 7 ta golli uzatma amalga oshirishga muvaffaq bo‘lgan.