Мюнхеннинг «Бавария» клуби ҳужумчиси Серж Гнабри жамоа раҳбарияти билан янги шартнома борасида ҳанузгача келиша олмаяпти.

26 ёшли футболчи немис клуби сафида қолмоқчи, бироқ у ўзига таклиф қилинган молиявий шартлардан рози эмас. Таъкидланишича, ҳужумчи ўз жамоадошлари Лерой Сане ҳамда Кингсли Команники сингари юқори маош олишни хоҳламоқда. Бу бонусларни ҳисобга олмаганда, йилига тахминан 15 миллион еврони ташкил этади.

Ўз ўрнида «Бавария» ҳам Гнабрини қўйиб юборишни истамаяпти. Бош мураббий Юлиан Нагелсманн ҳам футболчини жамоада сақлаб қолишдан манфаатдор.

Ушбу вазиятни Европанинг бир қатор топ-клублари диққат билан кузатиб туришибди. Агар Гнабри клубдан кетадиган бўлса, «Реал Мадрид», «Барселона», «Ливерпуль» ҳамда «Манчестер Юнайтед» жамоалари уни ўз сафига қўшиб олишга тайёр. Гнабрининг амалдаги шартномаси 2023 йилнинг ёзига қадар амал қилади.

Маълумот учун, немис футболчиси ушбу мавсумда жамоасининг жами 27 та ўйинида майдонга тушиб, 12 та гол ва 7 та голли узатма амалга оширишга муваффақ бўлган.