Bugun “Sport” telekanali jonli efirida Superliganing yangi mavsumiga qur’a tashlanadi. Unda jamoalar Berger tizimi asosida o‘z raqiblarini bilib oladi.

Biz 2021 yil davomida Superliga klublarni stadion yoritish tizimini yaxshlashga chaqirib keldik. Xususan, o‘tgan mavsum yozning uch oyida “Qo‘qon-1912”, “Surxon”, “Mash’al” va “Andijon” jamoalari uy uchrashuvlarini boshqa stadionda o‘tkazishiga to‘g‘ri keldi. Endilikda “Surxon” stadioni talab darajasiga kelguniga qadar klub o‘z uy uchrashuvlarini Samarqanddagi “Dinamo” stadionida o‘tkazadi. “Qo‘qon-1912” esa Yaypandagi “O‘zbekiston” stadionida raqiblarini qabul qiladi.

“Neftchi” va “Olimpik” jamoalari stadionida ta’mirlash ishlari olib borilayotgani tufayli, ular mavsum startida uy o‘yinlarini boshqa arenalarda o‘tkazadi. “Neftchi” Yaypandagi “O‘zbekiston” stadionidan, “Olimpik” Toshkentdagi “Paxtakor” stadionidan foydalanib turadi.

Qur’a avvalida uy o‘yinlarini bir stadionda o‘tkazadigan klublar o‘zaro juftliklarga ajratib olinadi. Shu orqali bir tur doirasida mazkur jamoalarning biri safarda, ikkinchisi esa uyda o‘ynashi ta’minlanadi. Demak, qur’a avvalida quyidagi uch juftlik alohida ajratib olinadi: “Paxtakor” va “Olimpik”, “Dinamo” va “Surxon”, “Neftchi” va “Qo‘qon-1912”.

Qur’ada sharchalarni tortish aynan mana shu jamoalardan boshlanadi. Bergerga ko‘ra, quyidagi raqamlar o‘zaro juft hisoblanadi:

1 va 8;

2 va 9;

3 va 10;

4 va 11;

5 va 12;

6 va 13;

7 va 14.

Ma’lumot uchun. Agar juftlikka ajratib olingan jamoalarga 4 yoki 11 raqamlaridan biri tushsa, ushbu ikki klub 1-turdayoq to‘qnash keladi. Qolgan kombinasiyalarda bunday holat kuzatilmaydi.