Bugun Farg‘ona viloyati Yaypan shahrida O‘zbekiston Superkubogi uchrashuvi bilan 2022 yilgi mamlakat futbol musobaqalariga start beriladi. Oradan bir hafta o‘tib milliy chempionat va birinchilik bahslari boshlanadi. Undan keyin estafetani Pro liga, Birinchi liga, yoshlar va o‘smirlar jamoalari o‘rtasidagi O‘zbekiston chempionatlari qabul qilib oladi, Ayollar Oliy ligasi yo‘lga tushadi.
Bu kabi keng ko‘lamli musobaqalarni qabul qilish uchun esa barcha qulayliklarga ega stadionlar, sifatli futbol maydonlari kerak bo‘ladi. Poytaxt viloyatining eng shimoliy qismida joylashgan Bekobod shahri esa katta futbol musobaqalarini qabul qilishga shay, deyish mumkin. Chempionat va birinchilik o‘yinlari o‘tkaziladigan shahardagi ikkita asosiy stadionda so‘nggi pardozlar ishlari ketayapti. “Metallurg” markaziy stadionida futbol maydoni deyarli ideal ko‘rinishga keldi. Maydon chimi bir tekis va yam yashil tusga kirib, ko‘zni quvontiradi. Mavsumlar oralig‘idagi tanaffus paytida stadion ma’muriyati katta hajmdagi ishlarni amalga oshirdi. Maydonga kerakli o‘g‘it, qum, tuproq to‘shaldi. Sug‘orish, parvarish ishlari rejaga muvofiq vaqtida bajarib borildi. Bu hafta maxsus texnika vositasi yordamida maydonga kerakli yuklama berilib, uning ravonligi tartibga keltirildi. Stadiondagi ovoz karnaylarining sozligi qayta tekshiruvdan o‘tkazildi. Bugun shuningdek stadion yoritqichlarining holati ham qayta ko‘rib chiqildi. Projektor vositalarining bevosita maydonni birtekisda yoritishini ta’minlash borasida sozlash ishlari amalga oshirildi.
Shuningdek, markaziy stadionda futbolchilarning kiyinish, yuvinish, hakamlar, o‘yin komissari xonalari, matbuot anjumanlari zali joriy ta’mirdan chiqarildi. Stadion tribunalari, nufuzli mehmonlar uchun CIP hamda VIP lojalari, OAV vositasi xodimlari bo‘lmasi, TV sharhlovchilar xonasi, TV tasvirchilari maxsus joylari tartibga keltirildi.
O‘zbekiston U-21 birinchiligi bahslarini qabul qiluvchi “Metallurg” stadionida ham ta’mirlash ishlari poyoniga yetib bormoqda. Bu stadionda ham kiyinish va yuvinish, hakamlar, uchrashuv komissari xonalari kapital ta’mirdan chiqarildi. Yangi jihozlar, stol, stul, o‘rindiqlar qo‘yilmoqda. Pardozlash, buyoq ishlari ham oxirlab qoldi. Bundan tashqari stadionning tribunalari ham tartibga keltirildi. Muxlislar uchun zarur qulayliklar yaratildi. Darvozalar ortiga maxsus ustunlar o‘rnatilib, buyaldi. To‘pning uzoqqa ketib qolmasligini ta’minlovchi maxsus to‘rlar osildi. Stadion maydoniga ham qayta ishlov berildi. Qum to‘shaldi, o‘g‘it solindi. Maydonning ravonligini ta’minlovchi maxsus mashina xizmatidan foydalanildi. Sug‘orish tizimidagi nosozliklar bartaraf etildi. Bir so‘z bilan aytganda Bekobod shahri, uning aholisi, shahar atrofida – tuman va xo‘jaliklarda istiqomat qiluvchi futbol muxlislari yangi mavsumning boshlanishini sabrsizlik bilan kutishmoqda.
