«Yuventus» himoyachisi Matteys de Ligt Turinning joriy mavsumdagi ehtimoliy chempionligi haqida gapirdi. Futbolchi klub Krishtianu Ronalduga sifatli o‘rinbosar topa olganidan juda xursand.

«Qaysidir paytda biz peshqadamlardan 14 ochkoga ortda qolgan edik, shu bois Skudetto haqidagi o‘y miyamdan biroz chetga chiqqandi. Biz Chempionlar ligasiga chiqishga e’tibor qaratishimiz kerakligini aytdik va o‘shandan beri biz o‘yinma-o‘yin rivojlanib kelmoqdamiz. «Inter», «Milan» va «Napoli» ochko yo‘qotishda davom etmoqda va biz hozirda birinchi o‘rindan atigi 7 ochko ortda boryapmiz. Mo‘’jiza ro‘y berishi kerak, ammo, vaziyat o‘n uch tur avvalgidan yaxshiroq ko‘rinmoqda.

Yoz oxirida Ronalduni yo‘qotdik, bu degani - tabiiyki bir mavsumda 30 ta gol yo‘qotdik. Biz uni darhol Vlaxovichdek futbolchi bilan almashtira olmadik. Albatta, mavsum boshida ko‘p narsani o‘tkazib yubordik.

Vlaxovichga qarshi o‘ynaganimda uning qanchalik kuchli va texnikali ekanligini allaqachon sezganman. Meni hayratda qoldirgan narsa uning gol urish uchun motivasiyasi bo‘ldi. Bizga u kabi hujumchi kerak edi”, - deydi De Ligt.