Pro-liganing 1-turidan o‘rin olgan "Sho‘rtan" - "Turon" (1:2) uchrashuvidan so‘ng "Turon" bosh murabbiyi Anvar Berdiyev matbuot anjumanida ishtirok etdi.
O‘yin haqida
- Avvalambor, barcha futbol muxlislarini yangi mavsum bilan tabriklayman. Bugun juda qiyin uchrashuv o‘tkazdik. Biz "Sho‘rtan"ga qarshi bahs oson kechmasligini bilardik va shunga mos tarzda tayyorgarlik ko‘rdik. Hammasi biz o‘ylagandek yakun topdi, g‘alabaga erishdik. Endilikda bu o‘yin tarixda qoladi. Oldimizda butun boshli mavsum kutib turibdi, tez fursatlarda navbatdagi o‘yin tayyorgarligini boshlashimiz lozim.
- Marlen Chobanovning harakatini qanday baholaysiz?
- Futbol bu - emosiyalarga boy o‘yin. Vaziyatni takroran ko‘rib chiqib tahlil qilamiz. Marlen Chobanov jamoamizga yangi mavsum oldidan kelib qo‘shildi. Oldinda hali bu futbolchining jamoamizga yordami tegishiga ishonamiz. Albatta, u bilan tushuntirish olib boramiz. Himoyachi vaziyatlarda sovuqqonlik bilan harakat qilishni ham bilishi kerak. Aytib o‘tganimdek, futbol emosiyalarga boy o‘yin. Ayrim vaziyatlarda futbolchi o‘zini boshqara olmay qoladi.
- Hisobda ortda borayotgan "Turon" o‘yin yakunida g‘alabaga erishdi. Bunga "Sho‘rtan"ning bo‘shashgani sabab bo‘ldi deb o‘ylaysizmi?
- Yo‘q, "Sho‘rtan" bugun juda yaxshi o‘yin ko‘rsatdi. G‘uzorliklarni uchrashuv davomida bo‘shashdi deb ayta olmayman. Men har doim jamoamiz futbolchilariga ta’kidlab kelaman, o‘yin hakam hushtagi chalinguniga qadar davom etadi. Vaziyat qanday bo‘lishidan qat’iy nazar, oxirigacha o‘ynash kerak. Har bir vaziyatni e’tibordan chetda qoldirmay harakat qilgan jamoa g‘alaba qozonadi.
- Jamoaning hozirgi tarkibi Pro-ligada qanday natija uchun kurasha oladi deb o‘ylaysiz?
- Avvalo, bizga yaratib berilayotgan sharoitlar uchun klubimiz xomiylariga minnatdorchilik bildiraman. Xomiylarimiz biz istagan futbolchilarni jamoaga jalb etishdi, ayrim futbolchilarni tarkibda saqlab qolishdi. "Turon"da futbol o‘ynash uchun barcha sharoitlar yaratilgan. Oldimizga yangi mavsumda Pro-ligada chempionlikni qo‘lga kiritgan xolda jamoani Superligaga qaytarish vazifasi qo‘yilgan. Biz barchamiz ushbu maqsadni amalga oshirish uchun astoydil harakat qilishga tayyormiz.
