«Arsenal» APLning so‘nggi turida «Uotford» ustidan g‘alaba qozonib, kuchli to‘rttalikka kirishni udda qildi. «MYU» esa bu bilan bir paytda «Manchester Siti»ga mag‘lub bo‘lgan edi. Oxirgi paytlarda muvaffaqiyatli odimlayotgan Mikel Arteta jamoasini ko‘pchilik keyingi mavsumda YECHLda o‘ynashiga ishonmoqda. Shimoliy London klubi 2017 yildan beri ushbu nufuzli musobaqada qatnasha olmayotir. O‘sha so‘nggi mavsumida «Arsenal» pley-off bosqichida «Bavariya» tomonidan umumiy hisobda 10-2 ga imkoniyatni boy bergan edi. Shundan beri «Arsenal» Yevropa ligasida uch marta qatnashdi. So‘nggi ikki mavsumni esa sakkizinchi o‘rinda yakunlashga majbur bo‘ldi. Hozir o‘sha 2017 yildagi jamoa tarkibi ayni damda qayerdaligi haqida ma’lumot bermoqchimiz.
David Ospina – darvozabon
Ospina 2019 yilda «Arsenal»dan ketib, «Napoli» safiga ko‘chib o‘tadi. Uning o‘rni Bernd Leno tomonidan to‘ldiriladi. David Ospina Neopol shahrida asosiy darvozabon sifatida harakat qilmoqda. Bugunga kelib uning jamoasi A seriya chempionligiga da’vogardir.
Nacho Monreal – himoyachi
Olti yillik beminnat xizmatidan keyin, ispan futbolchisi 2019 yilda o‘z yurtiga yo‘l oladi. U ayni damda «Real Sosyedad» safida harakat qiladi.
Loran Koselni – himoyachi
Fransuz o‘z jamoasini kuchli qilishga yordam berib keldi. Ayni damda biror klub sharafini himoya qilmayotgan futbolchi 2019 yilda «Arsenal»dan ketgan edi. U o‘z yurti jamoasi bo‘lmish «Bordo» safiga qo‘shiladi. Ammo Koselnining ishi u yerda unchalik yurishmadi.
Shkodran Mustafi – himoyachi
Mustafi ham Londondagi so‘nggi yillarini murakkab o‘tkazdi. U jamoadan tushib qola boshlagach, o‘z vataniga qaytdi. Bir muddat «Shalke» sharafini himoya qildi. Ushbu jamoa Bundesligadan tushib qolgach, Shkodran Ispaniyaga yo‘l oldi va ayni damda «Levante»da harakat qiladi.
Ektor Belyerin – himoyachi
Belyerin o‘tmishdan qolgan ikki futbolchidan biri va hali ham «Arsenal»ga tegishli. Ispaniyalik futbolchi o‘tgan yozda «Real Betis» safiga ijara asosida borib qo‘shilgan edi. U mavsum yakunlangach jamoaga qaytish niyatida emas va ko‘p ehtimol Ispaniyada qoladi.
Jaka – yarim himoyachi
Aynan YECHLdagi so‘nggi mavsum, Jakaning «Arsenal»dagi ilk davrlariga to‘g‘ri keladi. Ushbu futbolchi mana besh yildirki, jamoa bilan birga. U bilan ham ko‘plab muammolar yuz berdi. Jamoa sardorligidan mahrum etilgan shveysariyalik «Roma»ga ham o‘tishi mumkin edi. Ammo Arteta uni olib qoldi. Ayni damda u jamoaning asosiy futbolchilaridan biridir.
Chembrlen – yarim himoyachi
Ingliz futbolchisi 2017 yilda jamoani tark etgan. Bu esa u uchun foydali bo‘ldi. Ayni damda «Liverpul» safida harakat qilayotgan Chembrleyn so‘nggi uch yilda deyarli hamma narsani qo‘lga kiritdi. YECHL, APL, Jahon chempionligi shular jumlasidandir.
Aaron Remzi – yarim himoyachi
Remzi uchun ishlar rejadagidek ketmadi. 2019 yilda «Yuventus»ga borgan uelslik futbolchi, u yerda qiynaldi. Jarohatlar uni qiynadi. Ayni paytda esa Remzi Shotlandiyada, «Reynjers» safida ijara asosida harakat qiladi.
Aleksis Sanches – hujumchi
Sanches kutilmaganda «Manchester Yunayted»ga transfer qilinadi. Undan «Old Trafford»da ko‘p narsa kutilgan edi. Ammo u bir yil o‘tib, ijaraga, «Inter»ga berib yuborildi. 2020 yilda esa hujumchi milanliklar bilan doimiy bitim tuzdi.
Teo Uolkott – hujumchi
Uolkott «to‘pchilar»ning YECHLdagi so‘nggi mavsumida to‘prur edi. Ammo u 2018 yilda jamoani tark etib, «Everton»ga o‘tadi. Inglizning ayni damdagi klubi esa o‘zining yoshlikdagi jamoasi «Sautgempton»dir. Ammo u «avliyolar» safida jarohatlarga qarshi ancha uzoq kurash olib boryapti.
Olivye Jiru – hujumchi
Jiru Londonga 2012 yilda, «Monpelye» safidan tashrif buyuradi. U olti yil «Arsenal» bilan birga bo‘ldi. 2018 yilning yanvar oyida esa «Chelsi»ga sotib yuboriladi. 2021 yildan ushbu vaqtgacha esa, fransuz hujumchisi «Milan»ga Italiya chempionligi yo‘lida yordam berib kelmoqda.
ISMATOV J.
