Superliga 2-turidan o‘rin olgan “Surxon” – “Navbahor” (1:2) uchrashuvidan keyin termizliklar bosh murabbiyi Anxel Lopez Perez quyidagicha fikr bildirdi.

- Bugun har ikki bo‘limda ko‘plab imkoniyatlarga ega bo‘ldik. Garchi gol o‘tkazib yuborsakda, ustunlikni o‘z tomonimizga og‘dirishga, raqib yarim maydonida faol o‘ynashga intildik. Bugungi mag‘lubiyatga qaramay, jamoamiz o‘yinidan qoniqdim, yigitlar astoydil harakat qilib, maksimal kuch sarflashdi, - dedi Anxel Lopez Perez.

- Bugungi raqib - “Navbahor”ning o‘yini haqida fikringiz qanday?

- “Navbahor” O‘zbekistonning top-jamoalaridan biri, yaxshigina tarkib, mahoratli ijrochilarga ega. Himoyada ham, hujumda ham birdek faol o‘ynay oladi. Ushbu raqib bilan o‘yin o‘tkazish qiziq bo‘ldi, shunday kuchli jamoaga qarshi chiroyli o‘ynaganimizdan mamnunman. Mavsum oldidan tayyorgarlik uchun vaqtimiz oz edi, lekin biz shu muddat ichida barchasiga ulgurishga harakat qildik. Tanlagan yo‘limizdan bosqichma-bosqich oldinga intilishda davom etamiz, keyingi o‘yinlarda g‘alaba qozonishga harakat qilamiz.

- “Surxon” oldiga qanday vazifa qo‘yilgan?

- Birinchi galdagi maqsadimiz – raqobatbardosh jamoa shakllantirish, asta-sekin o‘yinimizni kuchaytirish. “Olimpik” bilan yomon o‘ynamadik, bugun “Navbahor”ga qarshi yanada kuchliroq o‘yin namoyish etib, o‘zimizni ko‘rsatdik, faqat biroz omad yetishmadi.

- Dastlabki ikki tur ortda qoldi. O‘zbekiston chempionatidan olgan ilk taassurotlaringiz bilan o‘rtoqlashsangiz.

- O‘zbekiston chempionatining saviya yuqori. Bungacha 8 ta turli mamlakatlarda ishlaganman, demakki, nima deyotganimni yaxshi bilaman. Turli darajadagi ligalarni ko‘rgan mutaxassis sifatida O‘zbekiston Superligasi ancha kuchli deya olaman, yaxshi klublar bor. Boshqa davlatga emas, aynan o‘zbek diyoriga, “Surxon”ga kelganim ham gapimga isbot bo‘lishi mumkin.

- “Surxon”ning uy o‘yinlarini Samarqandda o‘tkazayotgani noqulaylik tug‘dirmayaptimi?

- Albatta, mezbon maqomidagi bahslarning Termizda o‘tishini xohlardim. Chunki stadionimiz, muxlislarimiz, uyimiz o‘sha yerda. Hozircha esa, vaziyat taqozosiga ko‘ra, barcha o‘yinlarimiz mehmonda o‘tadi. Bu albatta, muayyan qiyinchiliklarni yuzaga keltiradi. Umid qilamanki, Termizdagi stadionda ta’mirlash ishlari yaqin vaqtlar ichida yakunlanadi va biz tezroq uyga qaytamiz.