Ralf Rangnik Chempionlar ligasida «Atletiko»ga qarshi bo‘lib o‘tadigan o‘yinni finalga tenglashtirdi.

«Manchester Yunayted» bugun APL 29-turi doirasida «Tottenxem» bilan o‘ynaydi, 15 mart kuni esa Chempionlar ligasi 1/8 final javob o‘yinida "Atletiko" jamoasini qabul qiladi.

"Ikki juda muhim o‘yin turibdi oldimizda. Birinchisi, Premyer-liga turnir jadvalida egallab turgan o‘rnimiz tufayli juda muhim. Kuchli to‘rtlikdan joy uchun kurashayotgan boshqa jamoalar bilan tenglashish uchun bizga uch ochko kerakligini aniq tushunamiz.

Seshanba kungi o‘yin finalga o‘xshaydi. Hisob 1:1, biz o‘z uyimizda o‘ynayapmiz va biz Chempionlar ligasining chorak finaliga chiqishni istaymiz.

Premyer-ligada so‘nggi uch oyda uchrashuv davomida 1:0 yoki 2:0 hisobida oldinda borayotgan vaziyatlarda juda ko‘p ochko yo‘qotdik. Bizda hozirgidan 4-6 ochko ko‘p bo‘lishi kerak edi. Shu bois ularni endi yo‘qotib bo‘lmaydi, ayniqsa, to‘g‘ridan-to‘g‘ri raqiblar bilan o‘yinlarda”, - dedi «Manchester Yunayted» bosh murabbiyi.