«Aston Villa» Eshli Yangning fikricha, «kanonirlar» kechagi kichik g‘alabaga haddan tashqari qattiq munosabatda bo‘lishdi.
«Ular qanday bayram qilishganini ko‘rdingiz. Rostini aytsam, xuddi APL chempion bo‘lgandek nishonlashdi. Ammo bu ular uchun qiyin bo‘lganini ko‘rsatadi», - dedi Yang VillaTV telekanaliga bergan intervyusida.
Shuningdek, u "Aston Villa" boshqa har qanday klub uchun qiyinchilik yaratishda davom etishini qo‘shimcha qildi.
«Biz Yevrokuboklarda o‘ynashni istaymiz, klubni avvalgi holiga qaytarishni xohlaymiz. Biz barcha jamoalarga qiyinchilik tug‘dirmoqchimiz, lekin eng muhimi, o‘yinlarda g‘alaba qozonishni istaymiz», - deya qo‘shimcha qildi Yang.
London klubi Bukayo Sakaning goli evaziga 1:0 hisobida g‘alaba qozondi va bu mavsumni kuchli to‘rtlikda yakunlash imkoniyatini sezilarli darajada oshirdi.
