«Vilyarreal» - maydonning markaziy hududidan eng ko‘p gol uruvchi jamoa. 1923 yilning 10 mart kuni tashkil etilgan Ispaniyaning bu «oddiy» klubi o‘ziga xos xarakteri bilan ko‘pchilik mehrini qozongan, qozonmoqda. «Sariq suvosti kemasi» ayniqsa, yangi asrda e’tiborga tushdi.
«Vilyarreal»ni zamonaviy yevrofutboldagi eng kurashuvchan, o‘ziga xos jamoalardan biri sifatida e’tirof etishlari bejiz emas. Umuman, «suvosti g‘avvoslari» XXI asrda katta siljishni amalga oshirishdi. Har holda, 20 yildan ortiq vaqt davomida Ispaniya quyi divizionlarining abadiy ishtirokchisi bo‘lib kelgan «Vilyarreal» Primerodagi debyutini mavsum-1998/1999da nishonladi va ortda qolgan davrda elitada doimiy ravishda 4-6-o‘rinlar uchun kurashuvchi kuchga aylandi.
Raqamlarda aytsak, «sariq submarina» 2004 yildan buyon yevrokuboklar (CHL va UYEFA kubogi/EL)da 8 marta 1|4 finalga chiqdi, 5 marta yarim finalda o‘ynadi. O‘tgan yili esa jamoa Yevropa Ligasi kubogini yutdi. Asosiysi, «Vilyarreal» bu parvozni katta xarajatsiz amalga oshirdi.
«Vilyarreal»ning yana bir xususiyati bor - jamoa futbolchilari maydon markazi hududidan gol urishni xush ko‘rishadi. Bu borada butun jahon futbolida «sariq suvosti kemasi» oldiga tushadigani topilmasa kerak. Har holda, XXI asrning o‘zida jamoa hayotida 4ta shunday gol kuzatilgan:
2004 yil 3 mart
«Vilyarreal» - «Galatasaroy» - 3:0 (Roxer)
2008 yil 8 aprel
«Betis» - «Vilyarreal» - 0:1 (Markos Senna)
2011 yil 15 yanvar
«Vilyarreal» - «Osasuna» - 4:2 (Kani)
2016 yil 22 sentyabr
«Vilyarreal» - «Real Sosyedad» - 2:1 (Nikola Sansone)
«Vilyarreal» tomoshabop o‘yinlari ortidan «Ikkinchi «Barselona» laqabini olgan. Ayniqsa, mavsum-2013/2014da jamoa o‘yini estetik zavq manbaiga aylangan edi.
