Xabaringiz bor, 25-29 mart kunlari Namanganda futbol bo‘yicha ilk marotaba “Navruz Cup-2022” xalqaro turniri bo‘lib o‘tadi.

Xalqaro turnirni yuqori saviyada o‘tkazish bo‘yicha bugun Namangan viloyati hokimi Shavkatjon Abdurazaqov hamda O‘zbekiston futbol assosiasiyasi vise-prezidenti Odil Ahmedov, shuningdek turnirga aloqador tashkilotlar vakillari ishtirokida yig‘ilish bo‘lib o‘tdi.

Yig‘ilishdagi asosiy masala xalqaro turnirda ishtirok etadigan jamoalarni yuqori saviyada kutib olish, mehmonxonalarda qulay sharoitlar yaratish, terma jamoalarning o‘yinlar o‘tkaziladigan stadionga borib kelishidagi xavfsizligini ta’minlash hamda mashg‘ulotlar o‘tkaziladigan maydonlarni shay holatga keltirish borasida tegishli mas’ullarga aniq topshiriqlar berildi.

Ayni paytda “Navruz Cup-2022” xalqaro turnirida qatnashadigan terma jamoalar Namanganga yetib kelishni boshladi. Bugun Tojikiston terma jamoasi yurtimizga yetib keldi. Tojikiston delegasiyasi Namangan shahridagi «Axsikent» mehmonxonasiga joylashdi.

21 mart sanasidan “Navruz Cup-2022” xalqaro turniriga tayyorgarlikni Toshkentda boshlagan O‘zbekiston milliy terma jamoasi ertaga Namangan shahriga jo‘nab ketadi. Srechko Katanes murabbiyligidagi terma jamoamiz bugungi mashg‘ulotni poytaxtimizdagi «Lokomotiv» stadionida o‘tkazdi. Darvoqe, milliy terma jamoamiz tarkibida kichik o‘zgarish sodir bo‘ldi: jarohatlangan himoyachi Akrom Komilov (AGMK klubi a’zosi) o‘rnini yana bir himoyachi, «Navbahor» klubi vakili Rustam Ashurmatov egalladi.