Fransiyaning «PSJ» klubi «Sevilya» markaziy himoyachisi Jyul Kundeni sotib olmoqchi.

23 yoshli futbolchini «Real», «Barselona», «Manchester Yunayted», «Liverpul» va «Chelsi» o‘z safiga qo‘shib olishni xohlamoqda. Fichajes nashrining ma’lumotlariga ko‘ra, «PSJ» Kunde uchun yangi da’vogarga aylandi.

Qayd etilishicha, parijliklarning yozgi transfer oynasidagi ustuvor vazifasi hujum chizig‘ini kuchaytirish bo‘ladi, biroq Serxio Ramosning jarohatlar bilan bog‘liq doimiy muammolari klubni himoyasini kuchaytirishga majbur qilishi mumkin.

Transfermarkt portali Jyul Kundeni 60 million yevroga baholamoqda. Futbolchi joriy mavsumda «Sevilya» safida 35 ta o‘yin o‘tkazgan.