AGMK bosh murabbiyi Mirjalol Qosimov O‘zbekiston kubogi guruh bosqichi 1-turidan o‘rin olgan "Lokomotiv"ga qarshi o‘yindan so‘ng (1:1) o‘z fikrlari bilan o‘rtoqlashdi.
"Shiddatli, tezkor va qarama-qarshi hujumlarga boy uchrashuv ko‘rdik. O‘ylaymanki, durang adolatli natija bo‘ldi. Bizda ham, "Lokomotiv"da ham bir qancha qulay imkoniyatlar kuzatildi. Hech qanday vaqt cho‘zishlarsiz, yuqori tempdagi qiziqarli uchrashuv guvohiga aylandik. Hech bir jamoa ikkinchi raqam ostida o‘ynamadi.
Biz har xil taktik uslublarni sinab ko‘ramiz. Bugun ham jamoa yangi taktikada o‘yinni boshlab, keyin uchrashuv davomida sxemani o‘zgartirdik. Chempionat davomida 2 yoki kerak bo‘lsa 3 hujumchi bilan ham o‘ynab ko‘ramiz. Bugun yangi taktikani sinovdan o‘tkazdik. Mavsum boshidanoq kutilmaganda jarohatlar kuzatila boshlandi. Diskvalifikasiya va jarohatlar ko‘p bo‘ldi. Sekin-asta to‘liq tarkib bo‘lyapmiz. Vaziyatdan kelib chiqib mavsum davomida har xil taktik uslublarni tadbiq etamiz", - dedi Qosimov.
