Avval xabar berganimizdek, “Andijon” klubi bugun O‘zbekiston Kubogi doirasida Superliga vakili – “So‘g‘diyona”ga qarshi o‘yin uchun tayyorgarlikni boshladi.

Kechki mashg‘ulotdan keyin esa jamoa qarorgohida iftorlik dasturxoni yozildi. Unda bevosita klub rahbari Jur’atbek Quvvatov ham ishtirok etdi.

Jamoa a’zolari bilan uchrashuv chog‘ida klub rahbari avvalo “Yangiyer” maydonida qo‘lga kiritilgan g‘alaba bilan tabrikladi. Shu bilan birga keyingi o‘yinlarda ham futbolchilardan yanada qat’iyat va katta ishtiyoq bilan g‘alaba uchun kurashishlarini so‘radi. Buning uchun o‘yinchilarni doimo moliyaviy tomondan qo‘llab-quvvatlashini ham bildirdi.

Jur’atbek Quvvatov shu bilan birga oldinda turgan muhim o‘yinlar uchun beriladigan mukofot pullarining miqdorini ham ochiq e’lon qildi. Unga ko‘ra, “So‘g‘diyona” jamoasiga qarshi o‘yinda g‘alaba qo‘lga kiritiladigan bo‘lsa, futbolchilar uchun 15 million so‘m mukofot pulini va’da qildi. Shuningdek, 29 aprel kuni pro liga doirasida safarda “Turon” bilan bo‘lib o‘tadigan bellashuvda esa g‘alaba uchun 20 million so‘m miqdorida mukofot puli bilan rag‘batlantirilishi ma’lum qilindi.

Bundan tashqari, oylik maoshlar bo‘yicha ayrim to‘planib qolgan qarzdorliklar ham reja asosida bartaraf etilishini alohida ta’kidlab o‘tdi.

Bir so‘z bilan aytganda, jamoa a’zolarining ish haqi umuman qolib ketmasligi, bundan mutlaqo xavotirga tushmasligi ta’kidlandi. Bor kuch va mahoratlarini g‘alaba uchun sarflashlarini aytgan holda murabbiy va futbolchilarga to‘liq ishonishini ham qo‘shimcha qilib o‘tdi.