Ispaniya La Ligasining 31-turida "Levante" o‘z maydonida "Barselona"ni qabul qildi.

Tan olish kerak, maydon egalari birinchi bo‘limda "Barselona"ga qaraganda yaxshiroq o‘yin namoyish etishdi. Bir qator golli vaziyatlarni ham sodir etishdi. Lekin, uchrashuvning eng kulminasion nuqtalari ikkinchi bo‘limda sodir bo‘ldi.

Ikkinchi bo‘lim boshlanishi bilan oldinga o‘tgan maydon egalari 52-daqiqada penalti tepish huquqini qo‘lga kiritishdi. Belgilangan 11 metrli jarima to‘pini Morales bexato bajardi - 1:0.

Oradan uch daqiqa o‘tgach bosh hakam yana "Barselona" darvozasiga penalti belgiladi. Bu safar 11 metrli jarima zarbasini Roxera Marti amalga oshirdi, ammo ter Shtegen uni qaytardi.

59-daqiqada Dembelening qanotdan oshirib bergan to‘pini Obameyang raqib darvozasiga aniq yo‘llab, muvozanatni tikladi - 1:1.

63-daqiqada esa zaxiradan maydonga tushgan Pedri va Gavilar "Barselona"ni oldinga olib chiqdi: Gavining o‘ng qanotdan oshirib bergan to‘pini Pedri to‘xtatmasdan raqib darvozasiga joylab qo‘ydi - 1:2.

Bellashuvning 83-daqiqada hakam yana mehmonlar darvozasi tomon penalti belgiladi. Bu safar Melero nuqtadan adashmadi va hisobni tenglashtirdi.

Xavi zaxiradan maydonga Adama Traore va Lyuk de Yonglarni tushirdi. Koronavirusga chalinib, maydonga qaytgan Lyuk de Yong 90+3 - daqiqada raqib darvozasini boshi bilan aniq nishonga olib, "Barselona"ga muhim uch ochkoni olib keldi.

"Levante" – "Barselona" 2:3

11 aprel, 00.00, «Syudad de Valensiya»

Gollar: 1:0 – 52, penalti Morales, 1:1 – 59 Obameyang, 1:2 – 63 Pedri, 2:2 – 83, penalti Melero, 2:3 – 90 de Yong.

"Levante" – Kardenas, Miramon, Postigo, Vezu (Kantero, 76), Rober, Son, Kampanya (Melero, 65), Radoya (Bardi, 76), Pepelu, Morales (Pubil, 90), Roxer Marti (Dani Gomes, 65).

"Barselona" – ter Stegen, Dani Alves (Langle, 81), Arauxo, Erik Garsiya, Alba, Buskets, de Yong (Gavi, 57), Niko Gonsales (Pedri, 56), Obameyang (de Yong, 84), Dembele (Traore, 84), Ferran Torres.

Ogohlantirishlar: Kampanya (11), Arauxo (87).