"Barselona" bosh murabbiyi Xavi "Kamp Nou" stadionida "Ayntraxt" muxlislarining ko‘pligidan norozi bo‘ldi.
“Stadiondagi muhit bizga umuman yordam bermadi. Bu bizning o‘yinga yomon ta’sir qildi. Garchi bu bahonadek bo‘lib tuyulsa-da, aytishim mumkinki, biz unchalik yaxshi o‘ynamadik. Stadion ikkiga bo‘linganida xuddi finalga o‘xshardi. Bu juda yomon ta’sir qildi", - deya Xavining so‘zlarini keltiradi Sport.es.
Kataloniyada bo‘lib o‘tgan Yevropa ligasining 1/4 final bosqichi doirasidagi o‘yinda “Barselona” “Ayntraxt”ga (2:3) mag‘lub bo‘ldi. Turli hisob-kitoblarga ko‘ra, Germaniyadan kelgan muxlislar soni 20 mingdan 30 mingtagacha bo‘lgan.
Ikki o‘yin (4:3) natijasiga ko‘ra, “Ayntraxt” Yevropa Ligasi yarim finaliga yo‘l oldi.
