«Chelsi» hujumchisi Timo Verner kecha «Arsenal»ga qarshi derbidagi jamoasining mag‘lubiyati haqida fikr bildirdi. Eslatib o‘tamiz, birinchi bo‘limda Verner o‘yinda uzoqdan yo‘llagan zarbasi bilan hisobni tenglashtirgandi.
«Albatta, gol urish yoqimli. Lekin men jamoaviy sportda o‘ynayman. Mag‘lubiyatga uchraganimiz uchun golim meni xursand qilmadi. Oxirgi uchta uy uchrashuvida juda ko‘p gol o‘tkazib yubordik, ammo kuchliroq bo‘lib qaytishni istaymiz. Yakshanba kuni bizni o‘z uyimizda yana bir muhim o‘yin kutib turibdi», - dedi Verner o‘yindan so‘ng.
Eslatib o‘tamiz, Timo Verner «Chelsi» safida so‘nggi to‘rtta o‘yinda uchta gol va bitta golli uzatmani amalga oshirdi.
