Rossiya futbol ittifoqining UYEFAdan OFKga o‘tishi haqida gap-so‘zlar tarqaldi. Umuman, bunga asos bor - geografiya. Konfederasiyani almashtirish masalasida ariza tushgan taqdirda, FIFA UYEFAning fikri bilan ham qiziqadi. Rozilik bildirilishi ehtimoli bor. So‘ngra ayni masalada OFK fikri so‘raladi. Mana shu yerda ovoz berish jarayonini kuzatish qiziq bo‘ladi. Yaponiya, Avstraliya, Taypey, Janubiy Koreya, Guam, Gonkong, Makao singari mamlakatlar siyosiy sabablarga ko‘ra, qarshi chiqishi mumkin. Kimdir JCH yo‘lida ortiqcha raqobatchini xohlamasligi mumkin. Umuman olganda, RFIda OFKga a’zo mamlakatlar qo‘llab-quvvatlashi natijasida, Kongress delegatlaridan 50 foizi ovozini olish imkoniyati yomon emas. Asosiy masala - bu RFIning o‘ziga kerakmi? OFKga o‘tish unchalik oson emas, UYEFAga qaytish esa yanada qiyinroq bo‘ladi.
***
- OFKga o‘tish orqali RFI jamoalarning rasmiy musobaqalardagi ishtirokini tiklash imkoniyatiga ega bo‘ladi. Ammo unutmaslik kerakki, OFKning navbatdagi Kongressi mayda o‘tkaziladi, shunday ekan, RFI konfederasiyani o‘zgartirish uchun ariza topshirishga ulgurmaydi.
Keyingi Kongress 2023 yilning yanvariga rejalashtirilgan. Hujjatlarni rasmiylashtirishga ulgurishsa, o‘sha yilning kuzida Rossiya klublarining ishtirokidan umid qilsa bo‘ladi. Aniqrog‘i, bu bitta turnir OFK kubogi bo‘lib, RPL chempioni bahslarga «pley-off»dan kirishadi. Klub reytingida Rossiya hisobida ball yo‘q ekan, yana qanday yo‘l tutish mumkin!?
Darvoqe, yana bir masala bor. RFI OFKning qaysi mintaqasidan joy oladi? Geografiya va siyosat nuqtai nazaridan qaraganda, rossiyaliklarga «Markaz» yengilroq bo‘ladi. Shunda OFK kubogida taxminan «Dordoy», «Xo‘jand», «So‘g‘diyona» va «Zenit» jamoalaridan iborat guruh vujudga keladi. Qisqa muddatda qilingan samarali ish kelgusida foyda keltirmasligi mumkin. Jahon futbolidan chetda qolmaslik uchun OFKga o‘tib, ke-yinchalik Osiyoda qolib ketish oqibatida qo‘lga kiritilgan yutuqlardan ziyon darajasi ortib ketishi hech gap emas.
