«Nyukasl» «Manchester Yunayted» yarim himoyachisi Pol Pogbani o‘z safiga qo‘shib olmoqchi, deya xabar beradi insayder Fabrisio Romano o‘zining ijtimoiy tarmoqlaridagi sahifasida.

Manbaga ko‘ra, ingliz klubi fransiyalik futbolchi bilan 2025 yilgacha shartnoma imzolashni rejalashtirgan.

Avvalroq Pogba faoliyatini «Real» yoki «PSJ»da davom ettirishi mumkinligi haqida xabarlar tarqalgan edi.

Joriy mavsumda 29 yoshli fransiyalik mankunianliklar safida 27 ta o‘yin o‘tkazib, 1 ta gol va 9 ta golli uzatmani amalga oshirgan.

Yarim himoyachining «qizil iblislar» bilan shartnomasi shu yozda yakuniga yetadi. Futbolchi 2016 yildan beri «Manchester Yunayted» safini himoya qilib kelmoqda. Kecha Pogba jamoadoshlari bilan xayrlashgani haqida ma’lumot paydo bo‘ldi.