Osiyo chempionlar ligasi "D" guruhining so‘nggi turida "Paxtakor" Saudiya Arabistonining "At-Ta’vun" klubi bilan to‘qnash kelib, muhim g‘alabani qo‘lga kiritdi. G‘alabaning muhimligi nimadan iborat ekanini quyida bilib olasiz.

Mezbonlar o‘yinning 12-daqiqasida hisobni ochishga muvaffaq bo‘ldi. Asosan yoshlar bilan o‘ynayotgan toshkenliklar esa tanaffusga qadar raqib darvozasiga naq 3 marta yo‘l topishdi.

Ikkita to‘p farqi bilan oldinga o‘tib olgan "Paxtakor" ikkinchi bo‘limda nisbatan xotirjamroq o‘ynay boshladi. Raqib esa bundan unumli foydalanib, 9 daqiqa ichida ikkita gol urdi va hisobni tenglashtirdi.

Shundan so‘ng Voyneski shogirdlari yana uyg‘onishdi va chiroyli kombinasiyalar orqali hujumlar tashkil eta boshlashdi. Dastlab Xolmatovning pasidan keyin Mirjahon Mirahmadov jamoasini oldinga olib chiqdi — 4:3. Ammo 83-daqiqada xitoylik referi "Paxtakor" darvozasi tomon penalti belgiladi. Amriy esa undan foydalanib, hisobni yana tenglashtirdi.

Paxtakorchilar uchrashuvda baribir g‘alaba to‘pini kiritishdi. Diyor Xolmatov burchakdan yetkazgan uzatmani Abbos Ergashboyev darvozaga joylab qo‘ydi. O‘yinga qo‘shib berilgan daqiqalarda ushbu futbolchining o‘zi oltinchi golni urishi ham mumkin edi. Ammo uning bosh bilan bergan zarbasidan so‘ng ustunga tegib, maydonni tark etdi.

Shu tariqa, "Paxtakor" guruh bosqichini 6 ochko bilan yakunladi. Ha, jamoa pley-offga chiqa olmadi. Ammo OFK koeffisiyentlar jadvalida O‘zbekiston uchun muhim ochkolarni keltirdi.

Bundan tashqari, "Paxtakor" "Nasaf"ning keyingi bosqichga chiqish imkoniyatlarini keskin oshirdi. Qarshiliklar ertaga "Al-Vihdat"ga 3ta to‘p farqi bilan yutqazishmasa kifoya.

Osiyo chempionlar ligasi, "D" guruhi. 6-tur
"PAXTAKOR" — "AT-TA’VUN" - 5:4
Gollar: Abbos Fayzullayev (23), Azizbek Turg‘unboyev (31), Sardor Sobirxo‘jayev (32), Mirjahon Mirahmadov (78), Abbos Ergashboyev (86) — Yazid al-Bakr (14), Sumayhan Aynabit (51, 60), Al-Amriy (83-penalti)
Ogohlantirishlar: Fayzullayev (16), Xadjiyev (27), Sayfiyev (82), Azmiddinov (82), Mirahmadov (84), Turg‘unboyev (90+3) — Hassan Amriy (36), Navof as-Subhiy (72)
"Paxtakor": Quvvatov, Alijonov, Azmiddinov, Xadjiyev, Sayfiyev, Aliboyev, Sobirxo‘jayev, Fayzullayev (Xolmatov 69), Turg‘unboyev (Yoqubov 90+3), Erkinov (Ergashboyev 79), Mirahmadov.
"At-Ta’vun": Bag‘aviy, Yazid Bakir, Tariq Muhammad (Fahad Rashidiy 54), Luyindama, Motaz Havsaviy (Abdulmalik al-Oyayariy 67), Navaf Subhiy, Sumayhan Nabit, Rayan Musa, Mustafo Fathiy, Hassan Amriy (Faysal Muhamad 84), Tavamba.
Hakamlar: Ma Ning, Shi Shiang, Kao Yi (Xitoy), Yansen Fu (Singapur).
Nazoratchi: Muhammad Juma (BAA).
Komissar: Mindu Dorji (Butan).