"Manchester Yunayted" hujumchisi Krishtianu Ronaldu o‘tgan oyda APLning eng yaxshi futbolchisi bo‘lganidan keyin mukofot haqida fikr bildirdi.
“Bu mening joriy mavsum Premyer-ligadagi ikkinchi, faoliyatimdagi oltinchi "oyning eng yaxshi futbolchisi" sovrinim. Bugun ham xuddi dastlabki kunlardagidek mukofotni qo‘lga kiritganimdan xursandman. G‘alabaga, muvaffaqiyatga tashnalik hech qachon so‘nmaydi. Meni qo‘llab-quvvatlagan barchaga rahmat”, - deb yozdi Ronaldu ijtimoiy tarmoqdagi sahifalarida.
Eslatib o‘tamiz, aprel oyida 37 yoshli portugaliyalik "qizil iblislar" safida 4 ta o‘yin o‘tkazib, 5 ta gol urgan edi.
“Manchester Yunayted” kelasi mavsumda Chempionlar ligasiga yo‘llanma olish imkoniyatini qo‘ldan boy berdi. Klub 37 ta o‘yindan so‘ng jamoa 58 ochko jamg‘arib, APL turnir jadvalida oltinchi o‘rinni egallab turibdi.
Joriy mavsumda Ronaldu “Manchester Yunayted” safida APLda 30 ta o‘yin o‘tkazib, 18 ta gol va 3 ta golga assistentlik qildi.
