Kecha Qozog‘istonda xizmat ko‘rsatgan murabbiy, Qozog‘iston Milliy olimpiya qo‘mitasining sobiq rahbari Beket Mahmutov xotirasiga bag‘ishlab o‘tkazilgan dzyudo bo‘yicha o‘smirlar o‘rtasidagi Osiyo kubogi-2022 musobaqasi o‘z yakuniga yetdi.

Almati shahridagi Baluan Sholak nomli sport saroyi mezbonlik qilgan musobaqada O‘zbekiston terma jamoasi muvaffaqiyatli ishtirok etdi. Hamyurtlarimiz ikki kunlik murosasiz bellashuvlar natijasiga ko‘ra 11ta oltin, 6ta kumush, 12ta bronza, jami 29ta medal qo‘lga kiritishdi.

Terma jamoamizning ushbu muvaffaqiyatlariga qizlarimiz munosib hissa qo‘shishdi. Ular barcha vazn toifalarida chempionlik shohsupasiga ko‘tarildi. Qozog‘iston terma jamoasi 3ta oltin, 8ta kumush, 18ta bronza medali bilan umumjamoa hisobida 2-o‘rinni band etishdi. Keyingi o‘rinlardan Qirg‘iziston va Turkmaniston terma jamoalari joy olishdi.

Bu natija O‘zbekiston dzyudosining ertangi kuni ishonchli qo‘llarda ekanidan darak beradi.