Pro liganing 9-turidagi markaziy o‘yin shubhasiz Andijondagi “Bobur Arena” stadionida bo‘lib o‘tadi.

20 may sanasida “Andijon” hamda “Buxoro” klublari ishtirokidagi uchrashuvga guvoh bo‘lamiz. Pro liganing ikki gigant jamoalari o‘rtasidagi bahsga bo‘lgan qiziqish har qachongidan yuqori darajada.

O‘z oldiga Superligaga qaytish vazifasini qo‘ygan mazkur klublar bo‘lajak o‘yinga jiddiy tayyorlanishyapti. “Buxoro” jamoasi hozircha pro ligada yagona mag‘lub bo‘lmagan klub bo‘lib turibdi.

Yodingizda bo‘lsa, “Mash’al” ham Andijonga hali mag‘lubiyat nimaligini bilmagan holda kelgandi. Lekin ilk mag‘lubiyatini “Bobur Arena”da qabul qilib olgan.

Bevosita “Andijon” hamda “Buxoro” klublari ishtirokidagi o‘zaro uchrashuvlar tarixiga nazar soladigan bo‘lsak, shu paytgacha jamoalar 48 marta to‘qnash kelishgan. Mezbonlar 14 bor buxoroliklarni mag‘lubiyatga uchratgan. Mehmonlar bo‘lsa 21 ta o‘yinda g‘olib chiqqan. Yana 13 ta uchrashuvda durang kuzatilgan. To‘plar nisbati: 64x80 “Buxoro” foydasiga.

Ushbu klublar oxirgi marta 2020 yilgi mavsumda Superligada to‘qnash kelishgan. O‘shanda “Andijon” safarda 2:2 hisobida durang o‘ynagan va o‘z maydonida “Buxoro”ni 2:1 hisobida mag‘lub etgan.

Umuman aytganda, “Burgutlar” “Buxoro”ga qarshi bellashuvlarda oxirgi uchta o‘yindan beri yutqazmayapti.