Yakshanba oqshomida Angliya Premyer-ligasida so‘nggi tur o‘yinlari bo‘lib o‘tadi. Shu sabab, bugun biz turnir jadvalidagi holatga va chempionatning oxirgi turidagi asosiy intrigalarga to‘xtalib o‘tamiz.
Odatdagidek, biz avvalo reglamentni ko‘rib chiqamiz. Agar ochkolar teng kelib qolgan taqdirda jamoalar jadvalda qanday joylashishadi? Premyer ligada birinchi o‘rinda to‘plar farqiga qaratiladi. Mabodo ular teng kelsa, keyin umumiy kiritilgan gollar soniga hisobga olinadi. Demak, barchasi tushunarli, endi esa asosiy intrigalarga to‘xtalamiz.
Chempionlik uchun kurash
“Manchester Siti” – “Aston Villa”
“Liverpul” – “Vulverxemtop”
Angliya chempioni nomi so‘nggi turda aniqlanadi. “Manchester Siti” “Liverpul”dan bir ochko oldinda va chempionlikni o‘ziniki qilishga juda yaqin turibdi. Vaziyat shundayki, mersisaydliklar chempion bo‘lishlari uchun, avvalo, “Vulverxempton”ni mag‘lub etishlari va "shaharliklar"ning mag‘lubiyatga uchrashiga umid qilishlari kerak. Agar, "Liverpul" ertangi o‘yinda durang o‘ynagan taqdirda, Xosep Gvardiola shogirdlarining “Aston Villa”dan yirik hisobdagi mag‘lubiyatga uchrashini kutishlariga to‘g‘ri keladi. Bu esa deyarli imkoni yo‘q narsa. Demak, chempion bo‘lish yoki uni qo‘shqo‘llab “Liverpul”ga topshirish – “Siti”ning o‘z qo‘lida.
YECHLning so‘nggi yo‘llanmasi uchun kechayotgan keskin bahs
“Norvich” – “Tottenxem”
“Arsenal” – “Everton”
“Chelsi” to‘plar nisbatiga ko‘ra uchinchi o‘rinda bormoqda. Tomas Tuxel jamoasi to‘rtinchi o‘ringa faqat nazariy jihatdan tushishib ketishi mumkin, ammo amalda buning amalga oshishi juda ham qiyin. Premyer-ligada Chempionlar ligasining so‘nggi, to‘rtinchi yo‘llanmasi uchun kurash "Tottenxem" va "Arsenal" o‘rtasida kechmoqda. To‘plar farqiga nazar tashlaydigan bo‘lsak, “shporlar” so‘nggi turda “Norvich”ga yutqazmasligining o‘zi kifoya qiladi. Agar, “kanonirlar” YECHLga chiqishni istashsa, 38-turda “Everton” ustidan g‘alaba qozonishi, hamda hamshaharining mag‘lubiyatini kutishlari talab etiladi.
Yevropa ligasi uchun kurash
“Kristal Pelas” – “Manchester Yunayted”
“Brayton” – “Vest Xem”
Chempionlar ligasi yo‘llanmasi uchun “Tottenxem” va “Arsenal” o‘rtasidagi kurashda mag‘lub bo‘lgan jamoa Yevropa ligasiga yo‘l oladi. Oxirgi turda “Manchester Yunayted” va “Vest Xem” ko‘hna qit’aning klublar o‘rtasida ikkinchi o‘rinda turadigan turnir yo‘llanmasi uchun o‘zaro bahs olib boradi. APL turnir jadvalida 7-o‘rinni egallagan klub Konferensiyalar ligasida ishtirok etadi. "Vest Xem" oltinchi o‘rinni egallash uchun "Brayton"ni mag‘lub etishi va "Manchester Yunayted"ning safarda kechadigan "Kristal Pelas"ga qarshi o‘yinida ochko yo‘qotishini kutishi kerak. Agarda, mankunianliklar durang o‘ynasa va “bolg‘achilar” g‘alaba qozongan taqdirda, London klubi Yevropa ligasi yo‘llanmasiga ega chiqadi. Sababi, “Vest Xem”da to‘plar farqi “qizil iblislar”nikiga qaraganda yaxshiroq.
Elitada jon saqlab qolish uchun kurash
“Byornli” – “Nyukasl”
“Brentford” – “Lids”
Yakshanba kuni "Uotford" va "Norvich" Premyer-liga bilan rasman xayrlashadi. Chempionshipga tushib ketadigan 3-jamoa nomi ertaga aniqlanadi. Bu "Byornli" yoki "Lids" klublaridan biri bo‘ladi. Hozir har ikki jamoa hisobida ham 35 ochko bor, ammo “Byornli”da kiritilgan va o‘tkazib yuborilgan gollar orasidagi farq yaxshiroq. Shu tariqa, so‘nggi turda “Lids” elitada jon saqlab qolishi uchun “Byornli”ni ochko yo‘qotishiga umid qilishi va safarda “Brentford” ustidan g‘alaba qozonishi talab qilinadi.
Jamshidbek Mahmudov tayyorladi.
