Yevropa klub futbolining bosh turniri - CHLga doir turli-tuman faktlar bir talay. Har bir natija o‘ziga yarasha qiziqarli.
Misol uchun, Braziliya futbolining loaqal bir vakili qatorasiga 10 yildan buyon «shalpangquloq» kubok sohibiga aylanmoqda. Bu borada braziliyaliklarga raqobat taqdim etayotganlar ham bor - xorvatiyaliklar.
** Joriy mavsum braziliyalik futbolchilarning bu masaladagi yurishlari davom etishi aniq. Binobarin, finalchilar - «Liverpul»da ham, «Real»da ham braziliyaliklar bor - Alisson, Fabinyo, Firmino, Rodrigo, Vinisius Junior, Kazemiro, Marselo, Eder Militao.
** Xorvatiya futboli esa ketma-ket 9 mavsumdan buyon o‘zining CHLdagi g‘olibini qutlamoqda. Lekin xorvatlarda seriyani davom ettirish ehtimoli 100 foiz emas. Chunonchi, «Liverpul»da bu yurt vakili yo‘q, qolaversa, «Real»da birgina Luka Modrich bor. Demak, Xorvatiya seriyasining 10-mavsumga cho‘zilishi «Real» va aynan shu faxriy yarim himoyachiga bog‘liq. «Liverpul»ni yengish oson vazifa emas, lekin bugungi «Qirollik klubi» uchun bajarib bo‘lmas missiya sanalmaydi aslo.
** Oxirgi 10 yillikka qarasak, CHLning 21ta oltin medali braziliyaliklar mulkiga aylandi. Eng sermahsul mavsum - 2014|2015. O‘shanda Neymar, Dani Alvesh, Korrea va Rafinya Alkantara «Barselona» safida g‘alaba qozonishgan. Yana 3 mavsumda 3 nafardan braziliyalik CHL taxtiga chiqqan.
** Xorvatiyada ushbu seriya ichidagi umumiy natija biroz kamtarroq - jami 12ta oltin medal. Shundan 8tasi Luka Modrich va Mateo Kovachichga tegishli (4tadan). E’tiborlisi, ular 2016-2018 yillar oralig‘ida qatorasiga 3 mavsum taxtdan tushishmagan («Real» bilan birga).
