"Yuventus"da ijara asosida o‘ynayotgan Madridning "Atletiko" klubi hujumchisi Alvaro Morata faoliyatini Turin klubida yakunlamoqchi. Bu haqda La Gazzetta dello Sport. xabar tarqatmoqda.

Manbaga ko‘ra, Turin klubi bosh murabbiyi Massimiliano Allegri ham 29 yoshli ispaniyalik futbolchini o‘z jamoasi safida saqlab qolishni afzal ko‘rmoqda.

Eslatib o‘tamiz, "Yuventus" hujumchini ikki yil avval ijaraga olgandi. Klublar o‘rtasidagi kelishuv 35 million yevroga sotib olish variantini o‘z ichiga olgan. Biroq Turin klubi rahbariyati transfer strategiyasini o‘zgartirdi va Morata uchun bunchalik katta pul to‘lashga tayyor emas.

Qayd etilishicha, Madrid klubi jiddiy imtiyozlar bermoqchi va ispaniyalikni 15 million yevro va bonuslar evaziga sotishga rozi.

2021/22 yilgi mavsumda Morata turinliklar safida 48 ta o‘yinda maydonga tushib, 12 ta gol urdi va 9 ta golli uzatmani amalga oshirdi.