O‘zbekiston 2023 yilda yana bir nufuzli musobaqa — 20 yoshgacha bo‘lgan futbolchilar o‘rtasidagi Osiyo chempionatiga mezbonlik qilishi haqida xabar berib o‘tgandik. Turnirning final bosqichi yo‘llanmasi uchun saralash bahslari sentyabr oyida o‘tkaziladi. Bugun esa ana shu saralash bosqichiga qur’a tashlash marosimi bo‘lib o‘tdi.
O‘zbekiston qit’a chempionatining final bosqichiga mezbonlik qilsa-da, saralash bosqichida ishtirok etishga qaror qilgan. Qur’a natijasida vakillarimiz "A" guruhidan o‘rin olishdi. Unda, shuningdek, saralash bosqichiga mezbonlik qiladigan Saudiya Arabistoni, Sharqiy Osiyoning kuchli jamoalaridan biri Xitoy hamda qit’amiz autsayderlari — Myanma va Maldiv orollari joy olishdi. Saralash uchrashuvlari joriy yilning 10, 12, 14, 16 va 18 sentyabr kunlari Saudiya Arabistonida o‘tkaziladi.
Saralash bosqichi bu safar Sharq va G‘arb mintaqalariga ajratilmadi. 10ta guruh g‘olibi va 2-o‘rinni egallagan jamoalar orasida 5ta eng yaxshi natijaga ega bo‘lgan jamoa yurtimiz maydonlarida o‘tadigan turnirga tashrif buyuradi. Agar O‘zbekiston o‘z guruhida 1-o‘rinni egallasa, u holda 2-o‘rinni egallaganlar orasida 6ta jamoa qit’a chempionati yo‘llanmasini qo‘lga kiritadi.
Osiyo chempionatida yuqori 4ta o‘rinni egallagan jamoalar 2023 yilning kuz faslida Indoneziyada o‘tkaziladigan Jahon chempionatida ishtirok etish huquqini qo‘lga kiritadi.
AFC U20 saralash bosqichi qur’a natijasi
"A" guruhi: Saudiya Arabistoni (mezbon), Xitoy, Myanma, Maldiv orollari, O‘zbekiston
"B" guruhi: Qatar, Bahrayn (mezbon), Bangladesh, Nepal, Butan
"C" guruhi: Yaponiya, Yaman, Falastin, Laos (mezbon), Guam
"D" guruhi: Iordaniya (mezbon), Xitoy Taypeyi, Suriya, Turkmaniston, Shimoliy Mariana orollari
"E" guruhi: Janubiy Koreya, Malayziya, Mo‘g‘uliston (mezbon), Shri Lanka
"F" guruhi: Indoneziya (mezbon), Vyetnam, Gonkong, Sharqiy Timor
"G" guruhi: Tailand, Ummon (mezbon), Filippin, Afg‘oniston
"H" guruhi: Avstraliya, Iroq (mezbon), Hindiston, Kuvayt
"I" guruhi: Tojikiston (mezbon), Kamboja, Livan, Singapur
"J" guruhi: BAA, Eron, Qirg‘iziston (mezbon), Bruney Dorussalom
