«MYU» hujumchisi Krishtianu Ronaldu APLning aprel oyidagi eng yaxshi futbolchisi sifatida tan olindi.
Portugaliyalik yulduz bu safar maxsus so‘rovda Kevin de Bryuyne («Manchester Siti»), Gabriel Jezus («Manchester Siti»), Leandro Trossard («Brayton»), Tyago Alkantara («Liverpul»), Son Xyun Min («Tottenxem»), Bruno Gimaraes («Nyukasl») va Natan Kollinz («Bernli»)ni orda qoldirdi. Ma’lumot uchun, 37 yoshli yulduz o‘tgan oy APL doirasidagi 4ta o‘yinda 5ta gol urdi. Jumladan, «Norvich» bilan uchrashuvda «xet-trik»ka erishdi va «Arsenal» hamda «Chelsi»ga 1tadan gol tortiq etdi.
* Krishtianu Ronaldu joriy mavsum oyning eng yaxshi futbolchisiga atalgan sovrinni ikkichi marta qo‘lga kiritdi. 2021 yilning sentyabr oyida ham aynan portugaliyalik yulduz e’tirof etilgandi.
* Krishtianu Ronaldu Angliyada oy laureati bo‘lish bobida «MYU» rekordchisiga aylandi. Endi unda bunday sovrinlar soni 6ta. Xullas, Krish «MYU»dagi faoliyati davomida 5 marta oyning eng yaxshi futbolchisi maqomini olgan afsona - Ueyn Runidan o‘zib ketdi.
* Krishtianu Ronaldu APL tarixida eng ko‘p oy laureati bo‘lgan futbolchilar ro‘yxatida 3-o‘ringa ko‘tarildi. Aniqrog‘i, u bu ko‘rsatkich bo‘yicha «Liverpul» afsonasi Stiven Jerrard (6 karra laureat) bilan tenglashib oldi. Oldinda turgan «Tottenxem» hujumchisi Garri Keyn va «Manchester Siti» tarixidagi bosh goleador Serxio Aguero hisobida esa 7tadan sovrin bor.
* Krishtianu Ronaldu may oyida ham laureat bo‘lsa, joriy mavsumning o‘zida APL rekordchilari qatoriga qo‘shiladi. Biroq oxirgi vaqtlarda «MYU»ning ishlari yurishmayotganini inobatga olsak, bu juda qiyin masala.
Darvoqe, murabbiylar so‘rovida «notanish» Mayk Jekson g‘olib chiqdi. Chunonchi, «Bernli» boshqaruvini qo‘lga olgan mutaxassis aprel oyidagi 4ta o‘yinda 3ta g‘alaba («Sautgempton» - 2:0, «Vulverxempton» - 1:0 va «Uotford» - 2:1) va 1ta durang («Vest Xem» - 1:1) qayd etdi. Jekson shu natijalar o‘laroq, Yurgen Klopp («Liverpul»), Xosep Gvardiola («Manchester Siti») va Tomas Frank («Brentford»)dan ko‘proq ball to‘pladi.
