Rolan Garrosning 13 karra chempioni Rafael Nadal musobaqaning chorak finalida Novak Jokovich ustidan qozonilgan g‘alabadan so‘ng o‘z fikrlarini bildirib o‘tdi.

"Novak bilan ikkimiz boy tarixga egamiz. Juda ko‘p muhim lahzalarni bo‘lishganmiz. Shu bois Jokovichga qarshi har bir o‘yin alohida ahamiyat kasb etadi.

O‘yindan so‘ng meni ehtiroslar qamrab oldi, chunki oxirgi 3,5 oy oson o‘tmagandi. Ammo endi boshimdan kechirgan barcha narsalar haqida gapirishni xohlamayman, harakat qilishda davom etishim lozim. Albatta, so‘nggi 3 oy xursandchilik bilan o‘tmadi. Shuning uchun g‘alaba o‘ziga xos bo‘ldi.

Juda hayajonga boy kecha bo‘ldi. Aynan shunday lahzalar uchun faoliyatimni davom ettiryapman. Ammo bu chorak final, hali hech narsa qo‘lga kiritmadim. Endi Rolan Garrosning yana bir yarim finalida ishtirok etish imkoniyatidan foydalanish kerak. Men uchun bu juda katta qiymatga ega.

Agar yomon o‘yin o‘tkazsam yoki mag‘lub bo‘lsam, bu yarim finalga e’tibor qaratmaganim uchun bo‘lmaydi. Menda tajriba bor. Hissiyotlarga berilib, sakraydigan odam emasman — juda barqaror insonman.

Barchasi qanday ishlashini bilaman. Hozir ajoyib va yoqimli lahzalarni tuyishim mumkin, ammo ertaga yarim finalga tayyorgarlikni boshlayman. Asosiy maqsadim — bugun ko‘rsatgan darajamni ushlab qolish", — dedi Rafael Nadal.

Rafael Nadal Rolan Garros musobaqasi chorak finalida jahonning birinchi raqamli tennischisi Novak Jokovich ustidan g‘alaba qozonib, yarim finalga yo‘l oldi. Ushbu bosqichda Nadalga Aleksandr Zverev raqiblik qiladi.