Xabaringiz bor, Argentina terma jamoasi kecha Finalissimada Italiyani mag‘lub etdi - 3:0. Hisobning o‘zi barchasini aytib turibdi: o‘yin sifatidagi farq juda kattadek bo‘lib tuyuldi. Italiya uchun yagona ovunchoq: Messi umuman Donnarumma darvozasiga yetarlicha xavf sola olmadi.
Argentina esa o‘z tarixini qayta yozishda davom etmoqda: jamoa ketma-ket 32 o‘yindan beri mag‘lub bo‘lmay kelyapti. Jamoa Italiyani mag‘lub etib, 1991 yil fevralidan 1993 yil avgustigacha qayd etgan o‘zlarining avvalgi rekordini yangiladi.
• Zamonaviy seriya 2019 yil iyul oyida Amerika kubogi bronza medali uchun o‘yinda Chili ustidan 2:1 hisobidagi g‘alabadan so‘ng boshlangan. O‘shandan beri Argentina umuman hech kimga mag‘lub bo‘lmadi: na rasmiy va na o‘rtoqlik o‘yinlarida. Bu seriyaga 2021 yilgi Amerika kubogi musobaqasi – Leo Messining terma jamoadagi ilk jiddiy sovrini ham kiritilgan.
• Argentinaliklarning seriyasi ajoyib: 22 g‘alaba va 10 durang, to‘plar farqi 56:17. Bu 7 uchrashuvdan iborat ketma-ket g‘alabali seriyani o‘z ichiga oldi.
• Argentinaning himoyasi ham mustahkam, jamoa bu vaqt oralig‘ida 14 ta gol o‘tkazib yubordi xolos. Qiziqarlisi, ushbu bahslar muntazam ravishda Braziliya, Urugvay va Janubiy Amerikaning qolgan kuchli jamoalariga qarshi uchrashuvlarda qo‘lga kiritildi.
• Argentinaning eng so‘nggi mag‘lubiyati 2019 yilgi Amerika kubogi yarim finalida Braziliyaga qarshi o‘yinda yuz berdi. O‘sha uchrashuvda Gabi Jezus va Roberto Firmino jamoasiga 2:0 hisobida ishonchli g‘alaba keltirdi va turnir finaliga yo‘l olgan edi.
O‘zi umuman, mag‘lubiyatsiz seriyalar terma jamoalar orasida trendga aylandi. Yaqinda italyanlar 37 o‘yinlik seriya bilan jahon rekordini yangilagandi. Keyin Jazoir ushbu voqeani yangilamoqchi bo‘ldi, lekin bir-ikki qadam yetmay qoldi.
• 2021 yil oktyabr oyida Italiya Millatlar ligasining yarim finalida Ispaniyaga mag‘lub bo‘lib, ajoyib seriyaga yakun yasadi. Bu 2018 yilning sentyabr oyidan beri birinchi mag‘lubiyat bo‘ldi, hatto Yevro-2020dagi g‘alabalarni ham o‘z ichiga oladi.
• Shuningdek, ispanlarda 2007 yilda boshlanib, 2009 yilda yakunlangan 35 o‘yindan iborat kosmik mag‘lubiyatsiz seriya ham mavjud.
• Jazoir Ispaniyaning rekordini takrorladi va 35 o‘yindan so‘ng to‘xtashga majbur bo‘ldi. Ammo jamoa uchun 2022 yilgi Afrika Millatlar Kubogi omadsiz keldi: avvaliga Ekvatorial Gvineyadan mag‘lubiyatga uchragan jazoirliklar (0:1) ushbu seriyani boy berishdi, keyin esa Kot-d'Ivuarga yutkazib, biryo‘la turnir bilan xayrlashib qo‘ya qoldi.
• Janubiy Amerika bo‘yicha olganda Argentinaning seriyasi rekord darajadagi ko‘rsatkich emas: 1993 yildan 1996 yilgacha bo‘lgan muddatda Braziliya 35 o‘yinda mag‘lub bo‘lmagan edi.
Finalissima - Argentina tarixidagi 20-kubok hisoblanadi.
Argentinaliklar Braziliyadan bu borada o‘tib ketdi va futbol tarixidagi eng ko‘p titulli jamoaga aylanishdi: 20 ta. Finalissimaning o‘tmishdoshi bo‘lgan Artemio Franchi kubogi ham Argentinaga nasib qilgan.
• Bu Messining milliy terma jamoadagi uchinchi sovrini: 2008 yilgi Olimpiada oltini, yuqorida tilga olingan 2019 yilgi Amerika kubogi va endi 2022 yilgi Finalissimadagi g‘alaba. Leoda yana bir sovrin uchun imkoniyat bor – u albatta Qatarga boradi va Jahon kubogini zabt etishga harakat qilib ko‘radi.
