19-may kuni Ispaniyaning El Chiringuito telekanali kutilmagan insayd bilan bo‘lishdi. Manbada aytilishicha, Fransiyaning “PSJ” klubi rahbariyati Kilian Mbappeni jamoada saqlab qolish uchun astoydil harakat qilib, 23 yoshli futbolchiga klubdan qandaydir “lavozim” taklif qilgan.
Ispaniyadagi manbaning so‘zlariga ko‘ra, shayxlar Kilianni olib qolishnishunchalar xohladiki, ular unga klubdan misli ko‘rilmagan vakolatlarni va’da qilishdi: murabbiylarni almashtirish va unga yoqmaydigan futbolchilardan ketkizish huquqi. Kutilmagan holat. Shunday emasmi? Tasavvur qiling, 2009 yilda “Manchester Yunayted” Ronalduning saqlab qolish uchun shunga o‘xshash lavozim berishi mumkinmidi? Agar, Krishtianu ham shunga o‘xshash vakolatni olganida, biz bilgan KriRo hozir shunday natijalar qayd eta olishi mumkinmidi? Albatta, qiyin savol. Ammo, hozir bu haqida emas. Booshqa masala haqida to‘xtalmoqchimiz.
Kilian haqida xabar birinchi marta matbuotda paydo bo‘lganida, ko‘pchilik buni feyk xabar deya munosabat bildirishdi. Haqiqatdan ham bunday bo‘lishi mumkin emas edi va hech kim kim ishonmadi. Biroq, u “Real”ga o‘tishga juda yaqin turgan bo‘lsa-da, 21 may kun kutilmaganda “PSJ” bilan shartnomasini uzaytirdi.
Fransuz bolaligidanoq "Santyago Bernabeu"da o‘ynashni orzu qilgani haqida matbuotda har kuni takrorlanib turar va u orzusini amalga oshirish uchun qo‘lidan kelganini qilishi taxmin qilinayotgan edi. Xo‘sh, Parijda unga nima va’da berishganki, Mbappe orzusidan juda oson voz kechdi?
Mbappening o‘zi qarorini quyidagicha izohladi: "Har doim aytganimdek bu mening uyim, mening shahrim. Men sovrinlarni qo‘lga kiritish uchun "PSJ"da o‘ynashda davom etaman. Klub ko‘p o‘zgarishlar arafasida turibdi. Men ham buning bir bo‘lagi bo‘lishni istayman. "Real Madrid" va Florentino Peresga rahmat aytmoqchiman. Men ularning hafsalasi pir bo‘lganini tushunaman. Bunday klub meni o‘z safiga qo‘shib olmoqchi bo‘lgani uchun o‘zimni omadli va sharafli his qilaman”.
Shu tariqa, Kilian Parijda qoladigan bo‘ldi: “PSJ” loyihasi haqiqatdan o‘zgardi. Endi klubni Mbappening shaxsan o‘zi boshqaradi. Yo‘q, bu kesatiq emas, rostan shunaqa. El Chiringuito nashridan keyin Ispaniyaning yana bir OAVsi boshqa insaydni e’lon qildi. Xabarlarga ko‘ra, Mbappe klub xo‘jayini Nosir Al-Xelayfiga jamoadan ketishi kerak bo‘lgan 14 futbolchidan iborat uzun ro‘yxatni taqdim etgan.
Mbappening ro‘yxatidan joy olgan o‘yinchilar:
Maurisio Pochettino, bosh murabbiy.
Neymar, hujumchi.
Mauro Ikardi, hujumchi.
Tilo Kerer, himoyachi.
Yulian Draksler, yarim himoyachi.
Danilo Pereyra, yarim himoyachi.
Leandro Paredes, yarim himoyachi.
Ander Errera, yarim himoyachi.
Leyvin Kurzava, himoyachi.
Pablo Sarabiya, hujumchi.
Xuan Bernat, himoyachi.
Idrissa Geye, yarim himoyachi.
Kolin Dagba, himoyachi.
Serxio Riko, darvozabon.
"Mbappening qora ro‘yxati" haqidagi xabar tvitterda shov-shuvlarga sabab bo‘lgach, Kilian buni tezda inkor etdi. Futbolchi Mundo Deportivo nashriga asoslangan holda SPORTbible chop etgan mish-mishlarni soxta deb atadi.
Bu haqiqatan ham soxtami yoki rost?! Bu hozircha aniq emas. Buni yaqin kunlar ichida bilib olamiz. Qiziqarli tomoni shundaki, agar "Pari Sen-Jermen" yuqorida nomi keltirilgan futbolchilarni sotadigan bo‘lsa, unda tarkibda kimlar qoladi?! Juda ham tushunarsiz va kutilmagan holat. Kuzatamiz.
Jamshidbek Mahmudov tayyorladi.
