Qatar U23 terma jamoasi bosh murabbiyi Nikolas Kordova Osiyo chempionati guruh bosqichining 3-turi doirasida Turkmanistonga qarshi o‘yin oldidan o‘z fikrlari bilan o‘rtoqlashdi.

«O‘zbekistonga qarshi o‘yindagi og‘ir mag‘lubiyatdan keyin Turkmaniston bilan bahs bizni kutib turibdi. Bizda keyingi bosqichga chiqish uchun imkoniyat mavjud.

O‘zbekistonning hujumdagi kuchi bizni juda ajablantirdi. Bu borada xatolar ustida ishlaymiz.

Futbolda o‘zingga kelib olish uchun hamisha imkoniyat beriladi. Hozirda jamoani tiklashga bor e’tiborni qaratyapmiz. Turkmanistonga qarshi o‘yinga futbolchilarni tayyorlash uchun bor kuchni beramiz. O‘zbekiston keyingi bosqichga chiqib bo‘lgan bo‘lsa, qolgan 3ta jamoada chorak finalga chiqish uchun imkoniyat mavjud.

Albatta, bunday mag‘lubiyatdan keyin hamisha og‘ir bo‘ladi. Yaxshilashimiz zarur bo‘lgan ko‘p jihatlarimizni aniqladik. Bundan tashqari, jamoani ruhiy jihatdan tayyorlashimiz zarur», — dedi Kordova.

Eslatib o‘tamiz, O‘zbekiston terma jamoasi guruhda 6 ochko bilan keyingi bosqich masalasini hal etib bo‘ldi. Turkmaniston 3 ochkoga ega bo‘lsa, Eron va Qatar hisobida bittadan ochko mavjud.