O‘zbekiston Superligasi 12-turidan o‘rin olgan “Navbahor” – “Metallurg” o‘rtasidagi uchrashuv arafasida “lochinlar”ning kuni kecha 28 yoshni qarshi olgan serbiyalik tajribali himoyachisi Boyan Siger bo‘lajak o‘yin haqidagi fikrlari bilan o‘rtoqlashdi.
- FIFA kunlari munosabati, ya’ni, O‘zbekiston milliy terma jamoasining Osiyo kubogi – 2023 saralash bahslarida ishtirok etgani bois, Coca Cola Superligasida salkam bir oylik tanaffus yuzaga keldi.
Fursatdan foydalanib, O‘zbekiston va jamoadoshim Ehsoni Panshanbe to‘p tepadigan Tojikiston termalarini Osiyo kubogi - 2023 final bosqichi yo‘llanmasini qo‘lga kiritgani bilan tabriklayman hamda kelasi yilgi musobaqada ushbu termalarga omad yor bo‘lishini tilayman.
Ta’kidlaganimdek, O‘zbekiston milliy chempionatida salkam bir oylik tanaffus yuz berganligi bois, muxlislar jamoamiz ishtirokidagi o‘yinlarni sog‘inishgan. Shu bois, bo‘lajak bahsda stadion ishqibozlar bilan to‘ladi, deya umid qilaman.
Bellashuv borasida to‘xtaladigan bo‘lsam, garchi “Metallurg” ayni paytda turnir jadvalining quyi pog‘onalarida borayotgan bo‘lsada, har bir raqibga hurmat bilan yondashish lozim. Boisi, Superligada oson o‘yinlar bo‘lmaydi.
Ammo biz ertangi bahsda g‘alaba qozonish, muxlislarga quvonch ulashish uchun barcha imkoniyatimizni ishga solamiz. Faqat buning uchun ishqibozlardan jamoamizni bevosita stadionda munosib qo‘llab-quvvatlab turishlarini so‘rab qolaman.
Fursatdan foydalanib, bizga barcha sharoitlarni yaratib berayotgan Namangan viloyati hokimi Shavkat Shokirjanovich Abdurazzoqov, shuningdek. “Navbahor” PFK rahbariyati, jumladan, klub prezidenti Otabek Arifovich Samatovga jamoamiz nomidan o‘z minnatdorchiligimni bildiraman.
“Navbahor” joriy mavsumda o‘z oldiga qo‘ygan yuksak maqsad, ya’ni, Osiyo Chempionlar Ligasi yo‘llanmasini qo‘lga kiritish uchun oxirigacha kurash olib boradi hamda buni amalga oshirish uchun biz – futbolchilar qo‘ldan kelganicha harakat qilamiz.
