"Barselona" matbuot xizmati jamoa stadioni "Kamp Nou"ning nomi o‘zgarganini e’lon qildi.

Endi stadion "Spotify Kamp Nou" deb nomlanadi.

Nomni o‘zgartirish "Barselona" va Spotify o‘rtasidagi kelishuvning bir qismidir. Homiy yordami bilan kataloniyaliklar qo‘shimcha mablag‘ oladi. Spotify shved musiqa striming xizmatidir. "Barselona" rahbariyati bundan klub oladigan summani aytmadi.

Ammo avvalroq turli xil insayderlar klub bu homiylikdan 300 million yevro ishlab olishi mumkinligini da’vo qilishgan.

Spotify biznesmen Daniyel Ekga tegishli. Uning boyligi 3,5 milliard yevrodan ortiq baholangan.

Avvalroq “Barselona” rahbarlari bir necha bor klubning jiddiy moliyaviy muammolari haqida gapirishgan. Futbolchilarning maoshlari sezilarli darajada kamayishi kerakligi xabar qilingandi.