«Monako»da ko‘zga tashlangan iqtidor Orelyen Tchuameni avvalgi hafta «Real» futbolchisi sifatida rasman tanishtirildi.
«Monako»da ko‘zga tashlangan iqtidor Orelyen Tchuameni avvalgi hafta «Real» futbolchisi sifatida rasman tanishtirildi. Fransiyalik futbolchi marosimdan keyin maxsus matbuot anjumanida ham qatnashib, jurnalistlar savollariga bafurja va ishonch bilan javob qaytardi.
- Orelyen, aytingchi, «Madrid»ga o‘tishda nechog‘li ikkilandingiz?
- Avvalo, bu yerda sizlar bilan ko‘rishib turganimdan bag‘oyat xursandman. «Real» formasini kiyish orzum ushaldi, nihoyat. «Madrid» - dunyodagi eng yaxshi klub. Albatta, yanada ko‘proq sovrin yutib, klub tarixini boyitishda davom etishdan umidvormiz. Ha, oldimda boshqa variantlar ham bor edi, ammo «Madrid» taklifini eshitgach, mutlaqo ikkilanmadim. Futbolda yorqin iz qoldirishni istayman. O‘ylaymanki, buning uchun eng yaxshi klub - «Real». Zero, eng kuchli futbolchilar hamisha shu jamoaga intilishadi. Shunday ekan, tanlovimda g‘ayrioddiy tomoni yo‘q.
- Taklifni qabul qilishda hamyurtlaringiz Kamavinga va Benzema fikrlariga qiziqdingizmi?
- Benzema va Kamavinganing bu yerda o‘ynashayotgani - mening omadim. Deylik, Eduardoning qisqa vaqtda qanchalik kuchaygani yaqqol ko‘zga tashlandi. Benzema esa hozirgi kunda dunyo futbolidagi eng kuchli hujumchidir. Savolingizga kelsak, muzokara jarayoni boshlangach, Karimning o‘zi menga xat yozib, «Real»da ishlar qanday yo‘lga qo‘yilganini tushuntirdi.
- Umuman, «Madrid» qo‘ng‘irog‘ini qanday qabul qildingiz?
- Yashirishga hojat yo‘q, boshqa klublar bilan muzokaraga kirishgan bo‘lsamda, «Real»dan taklif kutayotgandim. Nihoyat, klub vakillari aloqaga chiqishgach, bir soniya ham ikkilanmadim. Xususan, agentimga darhol kelishuvga erishish zarurligini tayinladim. Mana, endi «Madrid» futbolchisiman - bu fantastika. Axir bolalik orzum ro‘yobga chiqdi.
- «Qirollik klubi»dagi raqobat taftiga to‘liq tayyormisiz?
- Dunyoning eng yaxshi klubi safiga qo‘shildim, demak, mashg‘ulotlarda aslida nimalarga qodirligimni ko‘rsatishim shart. Tabiiyki, maydonda o‘z joyimni topish uchun qattiq ishlashim kerak. Ha, bu oson emas, lekin agar hozirdan nafaqat noyabrda boshlanadigan JCH, balki kundalik mashg‘ulotlar va «Real»ning o‘yinlari haqida ham bosh qotirsam, o‘ylaymanki, maqsadga erishaman. Umuman, «Real»da o‘ynash - yangi chaqiruv.
- «Yangi Kazemiro» ta’rifiga munosabatingiz...
- Kazemiro butun faoliyati davomida aql bovar qilmas darajada o‘ynadi. Yoshligimdan «Madrid» o‘yinlariga alohida qiziqqanman va aynan tayanch yarim himoyachilarning harakatlaridan o‘zgacha ilhomlanardim. Endi klubda o‘z sahifamni to‘ldirishim kerak - agar 5ta yevrokubok yutsam, tarixim juda zo‘r chiqardi.
- Karlo Anchelotti bilan ishlash qandayligini bilasizmi?
- Murabbiy bilan bir necha hafta oldin gaplashdim, uning men haqimda qanday fikrda ekanligiga qiziqdim. Don Karlo barchasini to‘g‘ri tushuntirdi: «Agar o‘sishda davom etib, dunyoning eng yaxshi yarim himoyachilaridan biriga aylanishni istasang, aynan «Real»ga o‘tishing kerak. Jamoada buning uchun barcha sharoitlar mavjud». Shartnoma ostiga imzo chekkanimdan keyin ham Anchelotti meni o‘z jamoasida ko‘rishdan baxtiyor ekanligini aytdi. Yaxshi murabbiy va shunday inson!
- Boshqa takliflar haqida ham ma’lumot bera olasizmi?
- Fransiya terma jamoasidagi do‘stim Mbappe mavsum yakunida «Monako»dan ketishim aniqligini bilardi. U «PSJ» safiga qo‘shilishimni so‘radi. Lekin o‘zim «Real»ni hamisha birinchi o‘ringa qo‘yganman. Kilian buni to‘g‘ri tushundi va men uchun xursand bo‘ldi.
- Xo‘sh, «Real» o‘yiniga qanday yangilik olib kirishingiz mumkin?
- Jamoaga o‘zgacha uzatmalar, to‘pni olib qo‘yish bilan yordam berishimga ishonaman. Yana jismoniy tomondan raqiblar hujumlarini bartaraf etishda samarali harakatlanaman. O‘ylaymanki, bu yerda yo‘qolib qolmayman.
- Maydonning qaysi hududida erkinroq to‘p surasiz?
- Bolaligimdan markazda, yarim himoyachiga duet bo‘lib o‘ynaganman. «Madrid»ning 4-3-3 taktik chizmasida «6-raqam» pozisiyasida harakatlanarman balki. Lekin «8-raqam» sifatida ham o‘ynay olaman, xuddi terma jamoada bo‘lgani kabi.
- Nega aynan 18-raqamni tanladingiz?
- Faoliyatimda asosan 8-raqam ostida o‘ynadim: kanterada, klubda, terma jamoada. Bu yerda esa «8»ning egasi bor - Toni Kroos. Shuning uchun bo‘sh raqamlardan birini tanlashimni aytishdi va «8»ga o‘xshashi tufayli «18»ni oldim.
- Kumirlaringiz haqida ham gapirib bersangiz...
- Zidan - nafaqat «Madrid», balki butun Fransiya uchun bosh kumir. 2006 yilgi JCHni juda yaxshi eslayman, o‘shanda jamoamiz finalni boy bergan, ammo Zidan ajoyib taassurot qoldirgandi. Shuningdek, aql bovar qilmas ishlarni davom ettirayotgan Karim Benzema faoliyati ham e’tiborimda. Qisqasi, fransiyalik sifatida aynan Benzema va Zidanga kumir sifatida qaraganman.
- Kun tartibingizda nimalarga alohida e’tibor qaratasiz?
- Amerika madaniyatidan ilhom olaman. Kobi Brayant va Maykl Jordan ishtirokidagi o‘yinlar videosini ko‘p tomosha qilaman - ular afsonaviy sportchilar. Dam olish yo‘q, minimal harakat bilan ham katta muvaffaqiyatga erishishni o‘ylash - xato. Shuning uchun har doim maksimal darajada ter to‘kish, o‘z ustimda ko‘proq ishlashga intilaman. Ayniqsa, «Madrid» kabi jamoalarda muvaffaqiyatga eltadigan boshqa yo‘l yo‘q.
- «Real» bisotidagi 14ta «shalpangquloq» kubok ham faqat oldinga undasa kerak...
- Albatta. Bu «Madrid»ning chindan ham, maqtovlarga munosibligidan dalolat. Prezident bilan gaplashdim, u klubga yangi sovrinlar kerakligini aniq tushuntirdi. «Real»ning sovrinlar xonasi aql bovar qilmaydigan darajada juda ta’sirli, albatta.
- Transferingiz bahosi bosim yuklamayaptimi?
- Transfer summasi haqida gapirmayman. Bu klublar o‘rtasida masala. Bugungi transferlar bozori avvalgidek emas, lekin ochig‘i, raqamlar meni umuman qiziqtirmaydi. Chunki vazifam boshqa - maydonda eng zo‘rlar qatoriga kirish.
M.PO‘LATOV tayyorladi
