"Manchester Yunayted"ning 37 yoshli portugaliyalik hujumchisi Krishtianu Ronaldu jamoani tark etishga yaqinlashmoqda. Bu haqda jurnalist-insayder Fabrisio Romano xabar berdi.
Manbaning xabariga ko‘ra, Ronaldu kecha, 5 iyul kuni yana "Manchester Yunayted" mashg‘ulotlariga kelmagan va buni oilaviy sharoit bilan izohlagan. Aytishlaricha, uning agenti Xorxe Mendesh imkon qadar tezroq futbolchi uchun rasmiy taklif topish imkoniyatlarini o‘rganmoqda.
Futbolchi 4 iyul kuni jamoaga qo‘shilishi kerak edi, biroq u bir necha kundan buyon o‘zini formasini saqlab qolish uchun Portugaliyadagi mashg‘ulotlar bazasida yakka tartibda shug‘ullanishda davom etmoqda. Avvalroq Ronaldu sotish uchun yaxshi taklif tushsa, klubdan o‘zini qo‘yib yuborishini so‘ragani ma’lum bo‘lgandi.
Krishtianu o‘tgan mavsumda "Manchester Yunayted" safida barcha turnirlarda 38ta o‘yinda maydonga tushib, 24ta gol va 3ta golga assistentlik qilgan.
