"Bavariya" sport direktori Hasan Salihamidjich 11 iyul, dushanba kuni Turinga uchib, "Yuventus" himoyachisi Matteys de Ligtning transferi borasida muzokaralarni boshlaydi, deb xabar beradi Bild.
Turin klubi 22 yoshli futbolchi uchun taxminan 80 million yevro olmoqchi.
Qayd etilishicha, himoyachi Myunxen klubiga o‘tsa, yiliga 17-19 million yevro maosh olishi mumkin bo‘ladi.
De Ligt o‘tgan mavsumda turinliklar safida 42 ta o‘yinda maydonga tushib, 3 ta gol urdi va 1 ta golli uzatmani amalga oshirdi. Himoyachining klub bilan shartnomasi 2024 yilning 30 iyuniga qadar amal qiladi.
